Nitish Kumar Visit Mumbai: पंतप्रधानपदाचा उमेदवार कोण ?; नितीश कुमार घेणार शरद पवार, ठाकरेंची भेट; मोदींना रोखण्यासाठी..

Nitish Kumar Will Meet to Uddhav Thackeray and Sharad Pawar: आगामी लोकसभा निवडणुकीच्या पार्श्वभूमीवर मोदी सरकारच्या विरोधात विरोधकांनी मोट बांधण्यास सुरवात केली आहे.

विरोधी पक्षांच्या हालचालींना वेग आला आहे. बिहारचे मुख्यमंत्री नितीश कुमार यांनी याबाबत पुढाकार घेतला आहे. ते गुरुवारी (ता.११) मुंबई दौऱ्यावर आहेत.

नितीश कुमार हे ठाकरे गटाचे पक्षप्रमुख, माजी मुख्यमंत्री उद्धव ठाकरे यांची मातोश्रीवर जाऊन भेट घेणार आहेत. ठाकरेंच्या भेटीनंतर ते राष्ट्रवादी काँग्रेसचे सर्वेसर्वा शरद पवार यांची भेट घेणार आहेत.

या भेटीमध्ये ते ठाकरे आणि पवार यांना देशभरातील विरोधी पक्षांची आघाडी उभारण्यासाठीच्या विशेष बैठकीचे निमंत्रण देणार असल्याचे समजते. भाजपाविरोधात एक मजबूत आघाडी बनवण्याचा विरोधकांचा प्रयत्न आहे. या भेटीत नेमकं ते काय बोलणार?, याकडे सर्वांचं लक्ष लागलं आहे.

नितीश कुमार यांनी यापूर्वी पश्चिम बंगलाच्या मुख्यमंत्री ममता बॅनर्जी, समाजवादी पक्षाचे सर्वेसर्वा अखिलेश यादव यांची देखील भेट घेतली आहे. त्यानंतर ते मुंबई दौऱ्यावर येत आहेत. आगामी लोकसभा निवडणुकीमध्ये विरोधकांकडून पंतप्रधानपदाचा उमेदवार कोण असेल याबाबत अद्याप कोणतीही माहिती समोर आलेली नाही.

मला पंतप्रधान व्हायचे नाही..

काही जण नितीश कुमार यांचे नाव पुढे करीत आहेत, पण मला पंतप्रधान व्हायचे नाही, असे नितीश कुमार यांनी स्पष्टपणे सांगितले आहे. मला विरोधकांची मजबूत मोट तयार करायची असल्याचं यापूर्वीच नितीश कुमार यांनी स्पष्ट केलं आहे. सर्वांनी एकजूट राहून भाजपला सामोरं जावं, अशी भूमिका नितीश कुमार यांनी घेतली आहे.

नितीश कुमार यांचा हा महाराष्ट्र दौरा विरोधकांच्या दृष्टीने अत्यंत महत्त्वाचा मानला जात आहे. गुरुवारी नितीश कुमार हे दुपारी एक वाजता मातोश्रीवर ठाकरेंची भेट घेतल्यानंतर ते सिल्व्हर ओकवर पवारांची भेट घेण्यासाठी जाणार आहेत.

(Edited By : Mangesh Mahale)