हरिद्वार : जगातील सर्वांत मोठा धार्मिक उत्सव असणाऱ्या कुंभमेळ्यात कोरोनाचा उद्रेक झाला आहे. कोरोना महामारीतही खबरदारी न घेता लाखो भाविक स्नानासाठी गंगा नदीच्या किनारी एकत्र आल्याने कोरोना रुग्णांच्या संख्येत मोठी वाढ झाली आहे. मागील पाच दिवसांत 1 हजार 700 भाविक कोरोना पॉझिटिव्ह आढळले आहेत. आता निर्वाणी आखाड्याचे महामंडलेश्वर कपिल देव यांचा कोरोनामुळे मृत्यू झाला आहे.
कपिल देव हे मध्य प्रदेशातून कुंभमेळ्यात सहभागी होण्यासाठी हरिद्वारमध्ये आले होते. कुंभमेळ्यात आल्यानंतर त्यांना कोरोना संसर्ग झाला. त्यानंतर त्यांना उपचारासाठी डेहराडूनमधील कैलास रुग्णालयात दाखल करण्यात आले. उपचारादरम्यान आज त्यांचा मृत्यू झाला. कुंभमेळ्यात कोरोना संसर्गामुळे मृत्यू झालेले कपिल देव हे पहिले मोठे संत आहेत.
कुंभमेळ्यात 10 ते 14 एप्रिल या कालावधीत 2 लाख 36 हजार 751 जणांची कोरोना चाचणी करण्यात आली. यातील 1 हजार 701 जण पॉझिटिव्ह आढळले आहेत. आरटी-पीसीआर आणि रॅपिड अँटिजेन चाचण्या करण्यात येत असून, यात अनेक आखाड्यांच्या महंतांसह भाविक पॉझिटिव्ह सापडले आहेत, आणखी काही चाचण्यांचे अहवाल हाती आलेले नसून, हा आकडा 2 हजारावर जाईल, अशी माहिती हरिद्वारचे मुख्य वैद्यकीय अधिकारी शंभूकुमार झा यांनी दिली.
हरिद्वार, टिहरी आणि डेहराडून जिल्ह्यांत 670 हेक्टर जागेवर कुंभमेळ्याचे आयोजन करण्यात आले आहे. अनेक आखाडे हे कोरोना चाचणी करुन घेण्यास नकार देत आहेत. यामुळे कोरोनाचा उद्रेक आणखी मोठा असण्याची शक्यता व्यक्त आहे. देशातील कोरोना रुग्णसंख्येत कुंभमेळ्यामुळे प्रचंड मोठी वाढ होईल, असा इशारा तज्ञ देत आहेत.
कुंभ मेळ्यात आतापर्यंत दोन शाही स्नान झाले आहेत. यातील पहिले 12 एप्रिलला आणि दुसरे 14 एप्रिलला झाले. ही पर्वणी साधण्यासाठी साधू-महंत, विविध आखाड्यांसह सुमारे 48.51लाख भाविक गंगा नदीवर आले होते. यातील बहुतांश हे मास्कविना होते. प्रचंड गर्दीमुळे सुरक्षित अंतर कुठेही दिसत नव्हते.शाही स्नानाची पुढील पर्वणी २७ एप्रिलला आहे.
कोरोनाची दुसरी लाट देशात आली आहे. देशभरात कोरोना रुग्णांची संख्या दिवसेंदिवस वाढत आहे. अशा परिस्थितीतही हरिद्वार येथील कुंभमेळ्यातील गर्दी कमी झालेली नाही. उत्तराखंडमध्ये कोरोनाचे रुग्ण वाढू लागले होते. हरिद्वारमध्ये पाच दिवसांत 1 हजार 701 जणांना संसर्ग झाल्याने नियोजित वेळेआधी कुंभमेळ्याची सांगता करण्यासाठी प्रशासन आखाड्यांशी चर्चा करीत असल्याचे वृत्त होते. परंतु, प्रशासनाने हे वृत्त फेटाळून लावले आहे.
हरिद्वार येथील कुंभमेळा येत्या ३० पर्यंत सुरूच राहणार असल्याचा खुलासा सरकारने केला आहे. हरिद्वार येथे गेल्या कोरोना रुग्णसंख्या वाढत असूनही नियम न पाळता साधू-संत, महंतांसह भाविकांनी गंगा नदीत स्नान केले होते. उत्तराखंडमध्ये कोरोनाचे रुग्ण वाढत असल्याने कुंभमेळ्याची सांगता नियोजित वेळेआधी करावी, अशी चर्चा उत्तराखंड सरकारकडून धार्मिक नेते व मोठ्या आखाड्यांशी करीत होते. मात्र अशी कोणतीही चर्चा झाली नसल्याचे सरकारे स्पष्ट केले आहे.
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.