नुपूर शर्मांना अटक करण्यासाठी मुंबई पोलीस चार दिवसांपासून दिल्लीत तळ ठोकून

नवी दिल्ली : प्रेषित मोहम्मद पैगंबर वादग्रस्त वक्तव्याप्रकरणी भाजपने (BJP) निलंबित केलेल्या नेत्या नुपूर शर्मा यांच्या अडचणी वाढत चालल्या आहेत. जागतिक पातळीवर हा मुद्दा गाजत असतानाच आता मुंबई पोलीस सक्रीय झाले आहेत शर्मा यांच्यावर मुंबईत गुन्हा दाखल झाला असून याप्रकरणी त्यांना अटक करण्यासाठी मुंबई पोलीस (Mumbai Police) चार दिवसांपासून दिल्लीत तळ ठोकून आहेत. (Nupur Sharma Latest Marathi News)

एका वृत्तवाहिनीवर बोलताना नुपूर शर्मा यांनी वादग्रस्त वक्तव्य केलं होतं. त्यानंतर देशासह जगभरातून त्याचा निषेध सुरू झाला. अनेक मुस्लिम बहुल देशांसह अमेरिकेनंही शर्मा यांच्या वक्तव्याचा निषेध केला आहे. तर भाजपनेही त्यांना प्रवक्ते पदावरून सहा वर्षांपासून निलंबित केले आहे. शर्मा यांच्यावर कारवाईसाठी देशभरात ठिकठिकाणी निदर्शनं करण्यात आली.

मुंबईत शर्मा यांच्याविरोधात गुन्हा दाखल करण्यात आला आहे. याप्रकरणी शर्मा यांना अटक होण्याची शक्यता आहे. त्यासाठी मुंबई पोलीस मागील चार दिवसांपासून तळ ठोकून आहेत. पण त्यांचा अद्यापही शोध लागलेला नाही, असं वृत्त इंडिया टुडेनं दिलं आहे.

मुंबईतील पायधुनी पोलीस ठाण्यात शर्मा यांच्याविरोधात गुन्हा दाखल झाला आहे. शर्मा यांना अटक करण्यासाठी पोलिसांकडे पुरेसे पुरावे असल्याची माहिती गृह विभागातील सुत्रांनी दिल्याचेही वृत्तात नमूद करण्यात आले आहे. मुंबईसह शर्मा यांच्याविरोधात ठाणे व देशभरात काही ठिकाणी गुन्हे दाखल झाले आहेत.

दरम्यान, नुपूर शर्मा यांच्या वक्तव्यानंतर त्यांच्यासह कुटुंबियांनाही धमक्या येत आहे. त्यामुळे दिल्ली पोलिसांकडून त्यांना सुरक्षा पुरवण्यात आली आहे. पण त्यानंतरही मुंबई पोलिसांना नुपूर शर्मा यांचा ठावठिकाणा लागत नसल्याने आश्चर्य व्यक्त केलं जात आहे.