फॅक्ट चेक : एअर इंडियाची मालकी टाटा समुहाकडे? काय म्हणाले मोदी सरकार...

नवी दिल्ली : सरकारी विमान कंपनी असलेल्या एअर इंडियाची (Air India) मालकी टाटा समूकाकडे गेल्याचे वृत्त शुक्रवारी सर्वच माध्यमांमध्ये झळकले. एअर इंडियाच्या अधिग्रहणासाठी टाटा समूहाने टाटा सन्स कंपनीने लावलेली वित्तीय बोली मोदी सरकारने स्वीकारल्याच्या बातम्या येत होत्या. पण त्यानंतर केंद्र सरकारकडून ही माहिती चुकीची असल्याचा खुलासा करण्यात आला आहे.

केंद्र सरकारच्या गुंतवणूक आणि सार्वजनिक संपत्ती व्यवस्थापन विभागाने (दीपम) याबाबत ट्विट करून स्पष्टीकरण दिलं आहे. 'सरकारने एअर इंडियाच्या अधिग्रहणासाठी वित्तीय बोलीला मंजूरी दिल्याच्या बातम्या प्रसिध्द झाल्या आहेत. या बातम्या चुकीच्या आहेत. याबाबत जेव्हा निर्णय होईल, त्याची माहिती माध्यमांना दिली जाईल,' असंही विभागानं स्पष्ट केलं आहे.

दरम्यान, एअर इंडियाच्या अधिग्रहणासाठी टाटा समूह आणि स्पाईस जेट या दोन कंपन्यांनी वित्तीय बोली लावली आहे. सरकारने नुकतंच म्हटलं होतं की, टाटा आणि स्पाईस जेट च्या बोलींचे मूल्यांकन सुरू करण्यात आलं आहे. तसेच सार्वजनिक क्षेत्रातील या कंपनीच्या खासगीकरणाची प्रक्रिया आता पुढील टप्प्यात पोहचली आहे. सरकार ही प्रक्रिया लवकरच पूर्ण करण्यासाठी उत्सूक आहे.

अघोषित आरक्षित मुल्याच्या आधारे वित्तीय बोलींचे मूल्यांकन केले जात आहे. ज्या बोलीमध्ये निश्चित मूल्याच्या अधिक किंमत दिली गेली असेल, त्या कंपनीची बोली स्वीकारली जाईल. टाटा कंपनीची बोली अधिक असल्यास एअर इंडिया 67 वर्षांनी पून्हा टाटाकडे जाईल. टाटा समूहाने ऑक्टोबर 1932 मध्ये टाटा एअरलाईन्सच्या नावाने एअर इंडियाची स्थापना केली होती. सरकारने 1953 मध्ये एअरलाईन्सचे राष्ट्रीयीकरण केले.

सरकारकडून एअरलाईन्समधील आपली 100 टक्के हिस्सेदारी विकत आहे. यामध्ये एअऱ इंडियातील 100 टक्के हिस्सा असलेली एआई एक्सप्रेस लि. आणि 50 टक्के हिस्सा असलेली एअर इंडिया एसएटीएस एअरपोर्ट सर्व्हिसेस प्रा. लि. या कंपन्यांचा समावेश आहे.