बंगळूर : राज्यसभेच्या निवडणुकीमुळं वातावरण तापलं आहे. यातच धर्मनिरपेक्ष जनता दलाच्या एका आमदारानं काँग्रेसच्या उमेदवाराला मतदान केलं आहे. राज्यात तिसऱ्या जागेसाठी संख्याबळ नसतानाही भाजप, काँग्रेस आणि जेडीएसनं उमेदवार मैदानात उतरवले आहेत. यामुळे मोठी चुरस निर्माण झाली आहे. असे असनाहीत क्रॉस व्होटींग करणाऱ्या आमदारावर कारवाई करण्यास जेडीएसचे प्रमुख एच.डी.कुमारस्वामी यांनी नकार दिला आहे. (Rajya Sabha Election News)
कुमारस्वामी म्हणाले की, हा व्यक्ती जेडीएसच्या तिकिटावर आणि आमच्या कार्यकर्त्यांच्या जिवावर निवडून आला आहे. त्याने आधी राजीनामा द्यावा आणि नंतर राजकारण करावे. त्याने कोलारमधील जनता आणि जेडीएस कार्यकर्त्यांचा अपमान केला आहे. त्याच्यावर पक्षाकडून कोणतीही कारवाई करण्यात अर्थ नाही. लोकशाही वाचवण्याच्या गप्पा मारणारी काँग्रेस दुसऱ्या पक्षाचे आमदार पळवत आहे. त्यांच्यात आणि भाजपमध्ये काय फरक आहे? सिद्धरामय्या आणि काँग्रेसकडून खालच्या पातळीवरील राजकारण सुरू आहे.
कोलामधील जेडीएसचे आमदार के.श्रीनिवास गौडा यांनी काँग्रेसच्या उमेदवाराला मतदान केलं. गुब्बीतील जेडीएसचे आमदार एस.आर.श्रीनिवास यांनी कोरी मतपत्रिका मतपेटीत टाकली. यामुळं जेडीएसच्या गोटात चितेंचे वातावरण आहे. जेडीएसचे प्रमुख कुमारस्वामी यांनीही याला दुजोरा दिला आहे. जेडीएसनं माजी खासदार कुपेंद्र रेड्डी यांना मैदानात उतरवलं आहे. आमदारांनी गोंधळ घातल्याने जेडीएसच्या चिंतेत भर पडली आहे. आता याचा फायदा काँग्रेस की भाजपला होतो, याची उत्सुकता आहे.
कर्नाटकात राज्यसभेच्या चार जागांसाठी निवडणूक होत आहे. विधानसभेतील संख्याबळानुसार भाजपचे (BJP) दोन तर काँग्रेसचा (Congress) एक उमेदवार जिंकू शकतो. चौथ्या जागेसाठी चुरस निर्माण झाली आहे. भाजप, काँग्रेस आणि धर्मनिरपेक्ष जनता दल (JDS) या तिन्ही पक्षांनी या जागेवर उमेदवार उभे केल्याने वातावरण तापलं आहे. राज्यसभा निवडणुकीत विजयासाठी उमेदवाराला ४५ मतांची गरज आहे. चौथ्या जागेसाठी भाजपकडे ३२, काँग्रेसकडे २४ अतिरिक्त मते तर जेडीएसकडे केवळ 32 आमदार आहेत. चौथी जागा जिंकण्यासाठी पुरेशी मते नसतानाही तिन्ही पक्षांनी उमेदवार उभे केले आहेत. काँग्रेस आणि जेडीएस या दोन प्रमुख विरोधी पक्षांपैकी कोणीही पराभव सहन करण्याच्या मानसिकतेत नाही. जेडीएसचे प्रमुख एच. डी. कुमारस्वामी यांनी काँग्रेसच्या भीतीनं आपल्या आमदारांना हॉटेलमध्ये ठेवले होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
