Himachal Pradesh BJP : भाजपने या नेत्यावर सोपवली मोठी जबाबदारी

Himachal Pradesh News : हिमाचल प्रदेश विधानसभेच्या निवडणुका काही दिवसांपूर्वीच पार पडल्या. त्यामध्ये काँग्रेसला सरकार स्थापन करण्यात यश आलं. सुखविंदर सिंग सुखू यांनी हिमाचल प्रदेशचे १५ वे मुख्यमंत्री म्हणून शपथ घेतली. तर आता हिमाचल प्रदेशमध्ये भाजपने माजी मुख्यमंत्री जयराम ठाकूर यांची पक्षाच्या विधीमंडळ पक्षनेतेपदी निवड केली आहे.

भाजपची रविवारी शिमल्यामध्ये बैठक झाली. त्या बैठकीत भाजपचे नेते मंगल पांडे यांनी जयराम ठाकूर यांच्या नावाचा प्रस्ताव मांडला. या प्रस्तावाला सर्व आमदारांनी पाठिंबा दिला. त्यामुळे जयराम ठाकूर हे आता पुढील पाच वर्षांपर्यंत भाजपच्या विधीमंडळ पक्षनेतेपदी असतील. तसेच हिमाचल विधानसभेतील विरोधी पक्षनेते देखील ते असतील.

विरोधी पक्षनेतेपदी निवड झाल्यानंतर जयराम ठाकूर (Jairam Thakur) म्हणाले, ''भाजपची प्रत्येक जबाबदारी प्राधान्याने पार पाडण्यासाठी आम्ही कटिबद्ध आहोत. प्रदेश भाजप विधिमंडळ पक्षनेते म्हणून माझ्यावर जबाबदारी दिल्याबद्दल भाजपच्या (BJP) सर्व आमदार व पदाधिकाऱ्यांचे आभार. तसेच सर्वांच्या सहकार्याने ही जबाबदारी पार पाडेन. तसेच विधानसभेमध्ये जनतेचा आवाज आम्ही बुलंद करू, असं ते यावेळी म्हणाले.

दरम्यान, हिमाचल प्रदेशच्या विधानसभा निवडणुकीसाठी १२ नोव्हेंबरला मतदान झाले होते. त्यानंतर या निवडणुकीत काँग्रेसला (Congress) सरकार स्थापन करण्यात यश आले. सुखविंदर सिंग सुखू यांनी हिमाचल प्रदेशचे (Himachal Pradesh) १५ वे मुख्यमंत्री म्हणून शपथ घेतली. या निवडणुकीत ६८ पैकी ४० जागा काँग्रेसने जिंकल्या आहेत.