ओवेसींनी 'योगीराज'चा अर्थ सांगत पंतप्रधान मोदींचे सांगितले तीन यार

पुणे : आगामी उत्तर प्रदेशातील विधानसभा निवडणुकीच्या (UP Assembly Election-2022) पार्श्वभूमीवर सर्वच पक्षांच्या नेत्यांनी प्रचाराचा धडाका लावला आहे. यामुळे नेते मंडळीकडून एकमेकांवर आरोप प्रत्यारोपाच्या फैरी झाडल्या जात आहे. यामध्ये ऑल इंडिया मजलिस-ए-इत्तेहादुल मुस्लिमीनचे (MIM) प्रमुख तथा हैदराबादचे खासदार असदुद्दीन ओवेसी(Asaduddin Owaisi) यांनी उत्तर प्रदेशातील सहारनपूर येथील एका सभेत पंतप्रधान नरेंद्र मोदी, (Narendra Modi) गृहमंत्री अमित शाह आणि उत्तरप्रदेशचे मुख्यमंत्री योगी आदित्यानाथ (Yogi Adityanath) यांच्यावर चांगलाच हल्लाबोल केला आहे.

सहारनपूर येथील सभेस संबोधित करताना औवेसींनी "मोदींचे तीन यार-नाटक, दंगल आणि अत्याचार" असे म्हणत पंतप्रधान नरेंद्र मोदी यांच्यावर जोरदार टीका केली आहे. तसेच, मोदी के तीन यार म्हणत ट्विटरवर टीकेचा व्हिडिओ ट्विट केला आहे. यानंतर औवेसींनी गृहमंत्री अमित शाह यांच्यावर सुद्धा टीका केली आणि आता शाहांना उत्तर द्यायचे आहे. आम्ही कोणाचे कर्ज बाकी ठेवत नाही, असे म्हणाले.

ओवेसी म्हणाले, "नसीमुद्दीनचे नाव घेतले मात्र, काँग्रेस पार्टी तर बोलणार नाही. नसीमचे नाव घेतले तर आमची मते मिळणार नाहीत. काँग्रेस इम्रानचे नाव घेणार नाही. समाजवादी पार्टी आझमचे नाव नाही घेणार. मात्र, आम्ही शाह आणि मुख्यमंत्री योगींना सांगू इच्छितो की, यूपीमध्ये योगी 'राज' (Raj) आहे. त्याचा अर्थ R म्हणजे रिश्वत, A म्हणजे अपराध, आणि J चा अर्थ जातीवाद, असे सांगत अमित शाह तुमचे कर्ज फिटले" अशा शब्दात त्यांनी शहा आणि योगी यांच्यावर टीका केली.

दरम्यान, ओवेसींनी या सभेत हरिद्वारच्या धर्मसंसदेतील वादग्रस्त वक्तव्यांचा मुद्दा उपस्थित करत ही धर्मसंसद भाजपा आणि पंतप्रधान मोदींच्या आशीर्वादाने पार पडल्याचे सांगितले व देशात मुस्लिमांच्या हत्येची चर्चा होत असताना त्याविरोधात कोणी आवाज का उठवला जात नाही, असा सवाल त्यांनी उपस्थित केला आहे. एका बाजूला कोरोना प्रादुर्भाव वाढत असला तरी येत्या फेब्रुवारी-मार्चमध्ये उत्तर प्रदेशात विधानसभेच्या निवडणुका होऊ शकतात. त्यामुळे सर्वच पक्षांनी प्रचाराचा धडाका लावला आहे. यामध्ये खुद्द पंतप्रधान यांनीही सहभाग घेतल्याने वातावरण अजून तापले आहे.