'आयटम' प्रकरणी कमलनाथ अडचणीत - eci seeks detailed report on congress leader kamal nath controversial remark | Politics Marathi News - Sarkarnama

'आयटम' प्रकरणी कमलनाथ अडचणीत

वृत्तसंस्था
बुधवार, 21 ऑक्टोबर 2020

मध्य प्रदेशात विधानसभा पोटनिवडणुकांची रणधुमाळी सुरू आहे. यातच काँग्रेस नेते कमलनाथ यांनी वादग्रस्त वक्तव्य करुन धुरळा उडवून दिला आहे. 

भोपाळ : मध्य प्रदेशात 28 विधानसभा मतदारसंघात पोटनिवडणुका होत आहेत. माजी मंत्री व भाजपच्या महिला उमेदवाराबद्दल बोलताना काँग्रेस नेते कमलनाथ यांनी केलेल्या वादग्रस्त वक्तव्यावरुन गदारोळ उडाला आहे. या मुद्द्यावर काँग्रेस नेते राहुल गांधी यांनाही जाहीर भूमिका घ्यावी लागली होती. यानंतरही कमलनाथ यांनी ठाम राहत कोणालाही न जुमानण्याची भूमिका घेतली आहे. मात्र, निवडणूक आयोगाने याची दखल घेतल्याने कमलनाथ अडचणीत आले आहेत.  

कमलनाथ यांनी जाहीर सभेत बोलताना माजी मंत्री व भाजपच्या उमेदवार इमरती देवी यांच्याबद्दल आक्षेपार्ह शेरेबाजी केली होती. इमरती देवी उभ्या असलेल्या डाबरा मतदारसंघातील  सभेत बोलताना कमनाथ यांनी हे वक्तव्य केले होते. आमचा येथील उमेदवार तिच्यासारखा नाही...काय बरे तिचे नाव? असा सवाल कमलनाथ यांनी सभेला उपस्थित नागरिकांना केला होतो. त्यावेळी नागरिकांना इमरती देवी यांचे नाव घेण्यास सुरूवात केली. यावर कमलनाथ म्हणाले होते की, माझ्यापेक्षा तुम्ही तिला चांगले ओळखता. तुम्ही लोकांनी आधीच मला सावधगिरीचा इशारा द्यायला हवा होता. ये क्या आयटम है. 

कमलनाथ यांनी केलेल्या  वादग्रस्त  विधानामुळे मोठा वाद निर्माण झाला आहे. महिला उमेदवाराबद्दल असे विधान केल्याबद्दल कमलनाथ यांनी माफी मागावी, अशी मागणी करण्यात येत आहे. या मुद्द्यावर भाजपही आक्रमक झाला असून, कमलनाथ यांच्याविरोध भाजपने मोहीम उघडली आहे. यामुळे काँग्रेस नेते राहुल गांधी यांना अखेर जाहीर भूमिका घेऊन या प्रकरणी कमलनाथ यांचे वक्तव्य दुर्दैवी असल्याचे म्हटले आहे.

यावर माध्यमांनी कमलनाथ यांना विचारणा केली असता त्यांनी हे राहुल गांधींचे व्यक्तिगत मत असल्याचे सांगितले. ते म्हणाले की, मी विधान कोणत्या संदर्भातून केले याबद्दल खुलासा केला आहे. माझा जर कोणाचा अपमान करण्याचा विचार नसेल तर मी माफी का मागावी? कोणाला अपमान झाला असेल असे वाटत असेल तर मी आधीच दिलगिरी व्यक्त केली आहे. 

या प्रकरणात निवडणूक आयोगाने मध्य प्रदेशच्या मुख्य निवडणूक अधिकाऱ्यांकडून सविस्तर अहवाल मागवला आहे. यामुळे कमलनाथ अडचणीत आल्याचे मानले जात आहे. याबाबत राष्ट्रीय महिला आयोगाने मुख्य निवडणूक आयुक्तांना पत्र लिहिले होते. कमलनाथ यांनी महिला उमेदवाराबद्दल आक्षेपार्ह वक्तव्य केल्याने त्यांच्यावर कारवाई करावी, असे महिला आयोगाने म्हटले होते. या प्रकरणी भाजपनेही निवडणूक आयोगाकडे तक्रार दाखल केली आहे.

मध्य प्रदेशातील राजकीय वातावरण आता पुन्हा तापू लागले आहे. राज्यात 28 विधानसभा मतदारसंघात पोटनिवडणुका होत आहे. या निवडणुका 9 नोव्हेंबरला  होत आहेत. काँग्रेसचे सरकार पाडणाऱ्या भाजपला धडा शिकवण्यासाठी काँग्रेस नेते व माजी मुख्यमंत्री कमलनाथ यांनी कंबर कसली आहे. राज्यातील भाजप नेत्यांना फोडून ते मुख्यमंत्री शिवराजसिंह चौहान आणि ज्योतिरादित्य शिंदे यांना अडचणीत आणण्याचा प्रयत्न करीत आहेत.  

जोतिरादित्य शिंदे यांनी काँग्रेस सोडून भाजपमध्ये प्रवेश केला होता. त्यावेळी त्यांच्यासोबत 22 आमदार काँग्रेसमधून भाजपमध्ये गेले होते. त्यामुळे कमलनाथ यांच्या नेतृत्वाखालील सरकार पडले होते. आता राज्यात एकूण 28 मतदारसंघात पोटनिवडणुका होत आहेत. यातील तब्बल 16 ग्वाल्हेर भागातील आहेत. शिंदे यांच्या ग्वाल्हेर या बालेकिल्ल्यात कमलनाथ यांनी काही दिवसांपूर्वी जोरदार शक्तिप्रदर्शनही केले होते. 

Edited by Sanjay Jadhav 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख