प्रयागराज हिंसाचार प्रकरण: आरोपीच्या घरावर बुलडोझर कारवाई

Prayagraj voilence news

नवी दिल्ली : प्रेषित मोहम्मद पैंगबर यांच्याबद्दल वादग्रस्त वक्तव्या प्रकरणी भाजपच्या नेत्या नुपूर शर्मा यांच्या अटकेची मागणी जोर धरु लागली आहे. त्यासाठी देशात ठिकठिकाणी निर्दशने करण्यात आली पण कालपासून या निदर्शनांनां हिंसक वळण लागले. उत्तर प्रदेशात शुक्रवारच्या नमाज पठणानंतर जामा मशिदीबाहेर हिंसक निदर्शने करण्यात आली.

आंदोलकांनी पोलिसांवर दगडफेक केली तर प्रत्युत्तरादाखल पोलिसांनी लाठीचार्ज, अश्रुधुराच्या नळकांड्या आणि गोळीबार केला. हिंसाचार आटोक्यात आणल्यानंतर प्रयागराज पोलिसांनी समाजकंटकांवर कारवाई सुरु केली आहे. या प्रकरणी यूपी पोलिसांनी आतापर्यंत 300 हून अधिक लोकांना अटक केली आहे.

यूपीच्या प्रयागराजमध्ये सर्वाधिक हिंसाचार झाला. याप्रकरणी आता योगी सरकारने या हिंसाचाराचा मुख्य आरोपी मुहम्मद जावेद उर्फ ​​जावेद पंप याच्या घरावर बुलडोअर कारवाई केली आहे. प्रयागराज प्रशासनाने मोठ्या पोलीस बंदोबस्तात रविवारी (12 जून) 'मुख्य आरोपी' जावेद मोहम्मदच्या करेली भागातील घरावर बुलडोझर चालवून त्याचे घर जमीनदोस्त केले.

या प्रकरणी प्रयागराजचे अतिरिक्त पोलिस महासंचालक (कायदा व सुव्यवस्था) प्रशांत कुमार म्हणाले की, “राज्यातील आठ जिल्ह्यांतून 304 जणांना अटक करण्यात आली असून नऊ जिल्ह्यांत या संदर्भात 13 एफआयआर नोंदवण्यात आले आहेत. प्रयागराजमध्ये 91, सहारनपूरमध्ये 71, हाथरसमध्ये 51, आंबेडकर नगर आणि मुरादाबादमध्ये प्रत्येकी 34, फिरोजाबादमध्ये 15, अलिगढमध्ये सहा आणि जालौनमध्ये 2 असे गुन्हे नोंदवण्यात आले आहे.

95 विरुद्ध गुन्हा दाखल

प्रयागराज हिंसाचारप्रकरणी पोलिसांनी 95 ओळख पटलेल्या आणि पाच हजार अनोळखी लोकांविरुद्ध गुन्हा दाखल केला आहे. याशिवाय एआयएमआयएमचे जिल्हाध्यक्ष शाह आलम, जीशान रहमानी, सपा नगरसेवक फजल खान, दिलशाद मन्सूरी, मजदूर सभेचे नेते आशिष मित्तल आणि अटाला क्षेत्राचा इतिहास पत्रक टिपू यांच्यावरही पोलिसांनी गुन्हा दाखल केला आहे.

जावेद पंपचे राजकीय कनेक्शन

पोलिसांनी यापूर्वीच जावेद पंपाला अटक केली आहे. प्रयागराजच्या अटाळा येथील रहिवासी जावेद पंपाचे राजकीय कनेक्शनही समोर आले आहे. जावेद हे पंप वेल्फेअर पार्टी ऑफ इंडियाचे प्रदेश सरचिटणीसही आहेत. जावेद पंप एकेकाळी तुल्लू पंप म्हणून काम करत असे. तुल्लू पंपाचे काम करणाऱ्या जावेदच्या नावासमोर पंप जोडण्यात आले. आणि तेव्हापासून लोक त्यांना जावेद पंप म्हणू लागले आणि हीच त्यांची ओळख बनली.

जेएनयूमध्ये शिकणाऱ्या मुलीवरही नजर

पोलिसांनी दिलेल्या माहितीनुसार, मोहम्मद जावेदची एक मुलगी जेएनयूमध्ये शिकते, जी जावेदला सल्ला देण्याचे काम करते. या प्रकरणात तीही दोषी आढळल्यास दिल्ली पोलिसांशी संपर्क साधून तिलाही ताब्यात घेतले जाईल.

प्रयागराजचा गोंधळ सर्वाधिक चर्चेत होता

प्रेषित मोहम्मद यांच्यावर वक्तव्य केल्याप्रकरणी भाजपमधून निलंबित करण्यात आलेल्या नुपूर शर्मा यांच्या विरोधात शुक्रवारच्या नमाजानंतर उत्तर प्रदेशातील अनेक शहरांमध्ये प्रचंड गदारोळ झाला होता. उत्तर प्रदेशची राजधानी लखनऊपासून अनेक शहरांमध्ये हिंसाचारही पाहायला मिळाला, पण प्रयागराजमध्ये ज्या पद्धतीने गोंधळ झाला तोच सर्वाधिक चर्चेत होता. दंगल करणाऱ्या 90 जणांची ओळख पटली असल्याचे प्रयागराज पोलिसांनी सांगितले. आतापर्यंत 68 गुन्हेगारांना न्यायालयात हजर केल्यानंतर त्यांची रवानगी नैनी मध्यवर्ती कारागृहात करण्यात आली आहे.