सीमेवर तणाव कायम; आसामचे मुख्यमंत्री अन् मिझोरामचे गृहमंत्री देणार भेट

नवी दिल्ली : आसाम व मिझोराम (Assam-Mizoram border clash) सीमेवर झालेला गोळीबार व दगडफेकीमध्ये आसाम पोलीस (Police) दलातील पाच जवानांचा मृत्यू झाला आहे. केंद्र सकारने दोन्ही राज्यांच्या सीमेवर केंद्रीय सशस्त्र राखीव दलाच्या (CRPF) तुकड्या तैनात केल्या आहेत. आता तेथील परिस्थिती नियंत्रात असल्याचे केंद्र सरकारने जाहीर केले आहे. असे असले तरी आसामचे मुख्यमंत्री आणि मिझोरामचे गृहमंत्री सीमाभागाला आज भेट देणार आहेत. 

आसाम-मिझोराम सीमेवरील स्थितीवर केंद्रीय गृह मंत्रालय नजर ठेवून आहे. सीआरपीएफच्या तुकड्या सीमेवर तैनात करण्यात आल्या आहेत. दोन्ही राज्यांतील पोलिसांत संघर्ष होऊ नये, यासाठी या उपाययोजना करण्यात आल्या आहेत. आसामचे मुख्यमंत्री हिमंता बिस्व सरमा हे आज सीमाभागाला भेट देणार आहेत. तसेच, मिझोरामचे गृहमंत्री लालचामलिना हेसुद्धा सीमाभागाला भेट देणार आहेत. यामुळे पुन्हा सीमेवर तणाव निर्माण होऊ नये म्हणून उपाययोजना केल्या जात आहेत. 

आसामचे मुख्यमंत्री सरमा यांनी आज सकाळी सिलचर मेडिकल कॉलेज अँड हॉस्पिटलला भेट देऊन जखमी पोलिसांच्या प्रकृतीची विचारपूस केली. ते म्हणाले की, रुग्णालयाला भेट देऊन जखमी पोलिसांच्या प्रकृतीची विचारपूस केली. सर्वांना चांगले उपचार मिळावेत, असे निर्देश डॉक्टरांना दिले आहेत. गंभीर जखमींना एअर अॅम्ब्युलन्सने दुसरीकडे उपचारासाठी हलवावे, अशा सूचनाही केल्या आहेत. 

हेही वाचा : देशाच्या सीमेवर वापरल्या जाणाऱ्या लाईट मशिन गन्सचा आसाम-मिझोरामच्या सीमेवर वापर 

गृहमंत्री अमित शहा मागील आठवड्यात ईशान्य भारतातील राज्यांच्या दौऱ्यावर होते. या दौऱ्यात त्यांनी सर्व राज्यांच्या मुख्यमंत्र्यांशी चर्चा केली. त्यानंतर दोनच दिवसांत आसाम आणि मिझोराम या दोन राज्यांमधील वाद चिघळला आहे. मिझोराममधील ऐजॉल, कोलाबिस आणि मामित तर आसाममधील कोचर, हेलकांडी आणि करीममंग या जिल्ह्यांच्या सीमा आहेत. या सीमेची लांबी 164.6 किमी एवढी आहे. मागील अनेक वर्षांपासून सीमाप्रश्नाचा मुद्दा असून त्यावरून सातत्याने हिंसा होते. दोन्ही राज्यांतील नागिरक अनेकदा एकमेकांना भिडतात. जून महिन्यातही अशीच घटना घडली होती.