बिपिन रावत यांच्या हेलिकॉप्टर अपघाताचं नेमकं कारण येणार समोर

नवी दिल्ली : सरसेनाध्यक्ष (CDS) जनरल बिपिन रावत (Bipin Rawat) यांचे हेलिकॉप्टर अपघातात निधन झाले आहे. तमिळनाडूतील कुन्नूरजवळ त्यांच्या हेलिकॉप्टरला अपघात झाला होता. या अपघाताबद्दल वेगवेगळ्या शक्यता वर्तवल्या जात आहेत. या हेलिकॉप्टरचा ब्लॅकबॉक्स अखेर सापडला असून, यामुळे अपघाताचे नेमके कारण समोर येण्यास मदत होणार आहे.

सूत्रांनी दिलेल्या माहितीनुसार, अपघातग्रस्त हेलिकॉप्टरचा ब्लॅकबॉक्स आता सापडला आहे. ब्लॅकबॉक्ससाठी अपघात घडलेल्या ठिकाणापासून 300 मीटर ते 1 किलोमीटर परिसरात शोध घेण्यात आला आहे. हेलिकॉप्टरचा ब्लॅकबॉक्स सापडल्याने अपघाताचे नेमके कारण समोर येणार आहे.

जनरल बिपिन रावत हे काल (ता.8) तमिळनाडूच्या निलगिरी पर्वत रांगेतील डिफेन्स सर्व्हिस स्टाफ कॉलेज वेलिंग्टन या ठिकाणी तिथले प्राध्यापक आणि विद्यार्थ्यांना मार्गदर्शन करण्यासाठी जात होते. परंतु, तमिळनाडूतील कुन्नूरजवळ त्यांच्या हेलिकॉप्टरला अपघात झाला होता. यातील 14 जणांपैकी 13 जणांचा मृत्यू झाल्याची माहिती हवाई दलाने दिली होती. रावत यांच्यासोबत या हेलिकॉप्टरमध्ये त्यांच्या पत्नी मधुलिका, ब्रिगेडियर एल. एस. लिड्डर, लेफ्टनंट कर्नल हरजिंदरसिंग, नायक गुरूसेवकसिंग, नायक जितेंद्रसिंग, लान्सनायक विवेक कुमार, लान्सनायक बी. साई. तेजा, हवालदार सतपाल हेही असल्याची माहिती समोर आली आहे.

दरम्यान, हा घातपात असावा अशी शक्यता निवृत्त ब्रिगेडियर हेमंत महाजन यांनी व्यक्त केली आहे. पुण्यात माध्यमांशी बोलताना महाजन म्हणाले, बिपीन रावत यांचा मृत्यू ही अत्यंत दुःखद बाब आहे. रावत हे एक चांगले अधिकारी होते. त्यांना मी भावपूर्ण श्रद्धांजली वाहतो. वडिलांच्या बटालियनमध्ये त्यांनी प्रवेश केला होता. ट्रेनिंगमध्येच उत्कृष्ट कामगिरीसाठी पदकही मिळवले होते. ईशान्य भारतातील घुसखोरी असो किंवा पाकिस्तानसोबत झालेली चकमक असो. या सर्व ठिकाणी तसेच काश्मिरमध्ये त्यांनी सर्वोत्कृष्ठ काम केले होते.

रावत हे आपल्या टीमसोबत हेलिकॉप्टरमध्ये असताना अपघात झाला. मेकॅनिकल फेल्युअर, हवामानात बदल होणे किंवा आकाशात उडणारा पक्षी समोर आला तरी अपघात होण्याची शक्यता असते. याव्यतिरीक्त पायलटची चूक होती का हे ही पाहणे गरजेचे आहे. मात्र सगळ्यात मोठी शक्यता घातपाताची वाटते. जर तसे असेल तर यामागे कोणता देश असेल त्यांना जशास तसे उत्तर द्यावेच लागेल. चीन सारख्या देशाने सायबर हल्ला करण्याचा प्रयत्न केला आहे का हेही पहावे लागेल, असेही महाजन यांनी सांगितले.