Karnataka Election 2023 : कर्नाटक जिंकण्यासाठी भाजपचा 'प्लॅन 5 बी'; तर बेळगावसाठी विशेष रणनीती

Karnataka Election 2023 : एप्रिल 2023 पूर्वी कर्नाटकात विधानसभा निवडणुका होण्याची शक्यता आहे. यावेळी भाजपने राज्यात स्पष्ट बहुमताचे लक्ष्य ठेवले आहे. विशेष म्हणजे आगामी विधानसभा निवडणुकांसाठी भाजपने कर्नाटकसाठी 'प्लॅन 5बी' ची रणनीती आखली आहे.

कर्नाटकात विधानसभेच्या 224 जागा आहेत. 2018 च्या विधानसभा निवडणुकीत सर्वात मोठा पक्ष असूनही भाजपला सरकार स्थापन करण्यात अपयश आले. या निवडणुकांमध्ये भाजपला 108 च जागा मिळाल्या. मात्र बहुमताच्या आकड्यापेक्षा ही संख्या 9 नेच कमी होती. यानंतर 80 जागा जिंकणाऱ्या काँग्रेस आणि 37 जागा जिंकणाऱ्या जनता दल सेक्युलरने (जेडीएस) मिळून सरकार स्थापन केले.

काय आहे भाजपचा 'प्लॅन 5बी'

भाजपच्या प्लॅन 5B मध्ये जिथे विधानसभेच्या 72 जागा असलेल्या एकूण पाच जिल्ह्यांवर लक्ष केंद्रित करावे लागणार आहे. यात बेंगळुरू, बेळगाव, बागलकोट, बिदर आणि बेल्लारी या पाच जिल्ह्यांचा समावेश आहे. 2018 मध्ये या जिल्ह्यांमध्ये भाजपला केवळ 30 जागा मिळाल्या होत्या. तर याठिकाणी काँग्रेसने 37 जागा जिंकल्या होत्या. तर जेडीएसला 5 जागांवर विजय मिळाला होता. आत भाजपला याठिकाणी कोणतीही चूक करायची नाहीये.त्यासाठी आतापासूनच रणनीती आखण्यास सुरुवात केली आहे.

2018 च्या निवडणुकीत शहरी भागात पाय रोवणाऱ्या भाजपला राजधानी बंगळुरूमध्येच मोठा धक्का बसला होता. बेंगळुरू जिल्ह्यात शहरी आणि ग्रामीण अशा एकूण 32 जागा आहेत, परंतु 2018 मध्ये याठिकाणी भाजपला केवळ 11 जागा मिळवता आल्या. या सर्व जागा बंगळुरू शहर परिसरातल्या होत्या. बंगळूरमध्ये शहरी भागात विधानसभेच्या 28 जागा आहेत.

बेळगाव जिल्ह्यात 18 जागा आहेत. गेल्या निवडणुकीत भाजपला येथे 10 जागा मिळाल्या होत्या. बागलकोटमध्ये पक्षाने 7 पैकी 5 जागा जिंकल्या. बिदर आणि बेल्लारीमध्येही पक्षाचे मोठे नुकसान झाले होते. बिदरमधील 6 जागांपैकी केवळ 1 जागा, तर बेल्लारीत 9 पैकी केवळ 3 जागा भाजपला मिळाल्या होत्या. त्यामुळेच यावेळी भाजपला या भागांमध्ये कोणतीही कमतरता ठेवायची नसून या भागासाठी भाजपने खास रणनीती तयार करून निवडणुकीची तयारी सुरू केली आहे.