बंगालमध्ये राजकीय भूकंप : भाजप खासदार मुकुल रॉय ममतादीदींच्या भेटीला - BJP leader mukul roy arrives at trinamool bhavan to meet mamata banerjee | Politics Marathi News - Sarkarnama

बंगालमध्ये राजकीय भूकंप : भाजप खासदार मुकुल रॉय ममतादीदींच्या भेटीला

वृत्तसंस्था
शुक्रवार, 11 जून 2021

पश्चिम बंगालमधील पराभवानंतर राज्यातील भाजपमध्ये अस्वस्थता निर्माण झाली आहे. यामुळे अनेक नेत्यांची घरवापसी होणार आहे. 
 

नवी दिल्ली : पश्चिम बंगालमधील (West Bengal) पराभवानंतर राज्यातील भाजपमध्ये (BJP) अस्वस्थता निर्माण झाली आहे. भाजपचे राष्ट्रीय उपाध्यक्ष व खासदार मुकुल रॉय (Mukul Roy) यांची आज घरवापसी होणार आहे. रॉय हे आज तृणमूल काँग्रेसच्या (TMC) प्रमुख व मुख्यमंत्री ममता बॅनर्जी (Mamata Banerjee) यांची भेट घेण्यासाठी तृणमूल भवनमध्ये दाखल झाले आहेत. 

मागील काही आठवड्यांपासून रॉय यांच्या घरवापसीची चर्चा आहे. भाजपचे पश्चिम बंगालचे प्रदेशाध्यक्ष दिलीप घोष यांनी नुकतीच पक्षाची बैठक कोलकत्यात बोलावली होती. या बैठकीला रॉय यांनी दांडी मारली. मागील काही दिवसांपासून रॉय यांनी मौन धारण केले आहे. सार्वजनिकरीत्या त्यांनी कोणतेही विधान केलेले नाही. मात्र, रॉय यांचे पुत्र शुभ्रांशू यांनी रॉय हे तृणमूलमध्ये परततील, ही शक्यता नाकारली नाही. 

मुकुल रॉय हे तृणमूल भवनमध्ये दाखल झाले आहेत. ममतांनी आज पक्षाच्या वरिष्ठ नेत्यांची बैठक तृणमूलमध्ये भवनमध्ये बोलावली आहे. रॉय हे ममतांची भेट घेऊन चर्चा करणार आहेत. यामुळे बंगालमध्ये राजकीय भूकंपाची शक्यता आहे. भाजपचा पराभव झाला असला तरी आताच पक्षाला खिंडार पाडण्याची तृणमूलची योजना आहे, अशी माहिती सूत्रांनी दिली. 

मुकुल रॉय यांच्या पत्नी आजारी असून, कोलकत्यातील रुग्णालयात त्यांच्यावर उपचार सुरू आहेत. त्यांच्या प्रकृतीची विचारपूस करण्यासाठी तृणमूलचे नेते अभिषेक बॅनर्जी यांनी नुकतीच रुग्णालयाला भेट दिली होती. यानंतर भाजपच्या गोटात मोठी अस्वस्थता निर्माण झाली होती. नंतर खुद्द पंतप्रधान नरेंद्र मोदी यांनीच थेट रॉय यांनी दूरध्वनी करुन त्यांच्याशी चर्चा केली होती. मोदी आणि रॉय यांच्यात काही मिनिटे संवाद झाला. रॉय यांच्या पत्नीच्या प्रकृतीबद्दल मोदींनी विचारपूस केली. त्यांच्यात राजकारणाबद्दल कोणतीही चर्चा झाली नाही, अशी भाजपमधील सूत्रांनी दिली होती. 

मोदींनी फोन केल्यानंतर रॉय यांनी जाहीरपणे कोणतेही विधान करणे टाळले होते. रॉय हे आज ममता बॅनर्जी यांची भेट घेणार आहेत. त्यानंतर त्यांच्या पक्ष प्रवेशाचा कार्यक्रम होईल. रॉय यांच्यामुळे तृणमूलचे अनेक खासदार आणि आमदार भाजपमध्ये गेले होते. यानंतर तेही तृणमूलमध्ये परततील, अशी माहिती सूत्रांनी दिली. 

हेही वाचा : रिटा बहुगुणा बहुदा सचिन तेंडुलकरशी बोलल्या असाव्यात

मुकुल रॉय यांनी ममतांवर व्यक्तिगत पातळीवरील टीका करणे टाळले, त्यामुळे त्यांचा समावेश मवाळ नेत्यांमध्ये होतो. याचवेळी सुवेंदू अधिकारी यांनी सातत्याने ममतांना लक्ष्य केले त्यामुळे त्यांचा समावेश जहाल नेत्यांमध्ये होतो. मवाळ नेत्यांसाठी तृणमूलचे दरवाजे खुले आहेत. या पार्श्वभूमीवर तृणमूलचे सरचिटणीस अभिषेक बॅनर्जी यांनी मुकुल रॉय यांची घेतलेली भेट महत्वपूर्ण होती, अशी माहिती सूत्रांनी दिली. 

पश्चिम बंगालच्या मुख्यमंत्री ममता बॅनर्जी आणि तृणमूल काँग्रेसची साथ सोडून भाजपमज्ये प्रवेश करणाऱ्या पहिल्या फळीतील नेत्यांमध्ये मुकुल रॉय यांचा समावेश होता. भाजपचा पराभव झाल्यानंतर तृणमूलमधून आलेले अनेक नेते उघडपणे घरवापसीबद्दल बोलू लागले आहेत. या पार्श्वभूमीवर रॉय हे पुन्हा तृणमूलमध्ये परतणार अशी चर्चा सुरू झाली. भाजपमध्ये ते बाजूला फेकले गेले असून, ते नाराज असल्याचेही बोलले जात आहे. काही दिवसांपूर्वी त्यांचे पुत्र शुभ्रांशू यांनी केलेल्या फेसबुक पोस्टमुळे ही चर्चा सुरू झाली.  

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख