Shivsena : संसदेतील शिवसेना कार्यालयातील ठाकरे पिता पुत्रांचे फोटो हटवले

Maharashtra Politics : शिवसेना पक्ष आणि धनुष्यबाण चिन्ह शिंदे गटाला देण्याचा निर्णय केंद्रीय निवडणूक आयोगाने दिला. त्यानंतर शिंदे गटाने संसदेतील आणि विधिमंडळातील शिवसेना पक्ष कार्यालयाचा ताबा घेतला.

यानंतर आता संसदेतील शिवसेना कार्यालयातील फोटो बदलल्याचे समोर आले आहे. संसदेतील शिवसेना कार्यालय शिंदे गटाकडे आल्यानंतर आता कार्यालयातील उद्धव ठाकरे आणि आदित्य ठाकरे यांचे फोटो हटवण्यात आले आहेत.

संसदेतील शिवसेना कार्यालयातील उद्धव ठाकरे आणि आदित्य ठाकरे यांचे फोटो हटवून तेथे एकनाथ शिंदे आणि आनंद दिघे यांचे फोटो लावण्यात आले आहेत. त्यामुळे संसदेतील शिवसेना कार्यालयाचे चित्र बदलल्याचे दिसून येत आहे.

दरम्यान, संसदेतील शिवसेना कार्यालयात आता बाळासाहेब ठाकरे यांच्या फोटोसोबत एकनाथ शिंदे आणि आनंद दिघे यांचे फोटो दिसून येत आहेत. उद्धव ठाकरे आणि आदित्य ठाकरे यांचे फोटो हटवण्यात आल्याने पुन्हा एकदा राजकारण तापण्याची शक्यता आहे.