Dhirendra Shastri : बागेश्वर बाबा पुन्हा बरळले ; तुकोबारायानंतर आता साईबाबांविषयी उधळली मुक्ताफळे

Dhirendra Shastri controversial statment over sai baba : देशातील राष्ट्रपुरुष, साधुसंत यांच्याविषयी वादग्रस्त विधान करण्याचे सत्र सुरुच आहे. काल (शनिवारी) कोल्हापुरात कालीचरण महाराज यांनी महात्मा गांधी यांच्याबाबत पुन्हा वादग्रस्त विधान केले आहे.

हे प्रकरण ताजे असतानाच बागेश्वर बाबा यांनी पुन्हा एकदा वादग्रस्त वक्तव्य केले आहे. त्यामुळे नवा वाद निर्माण झाला आहे. जबलपूर येथील एका कार्यक्रमात त्यांनी हे विधान केले आहे.

यापूर्वी बागेश्वर बाबांनी संत तुकाराम महाराज यांच्याविषयीही वादग्रस्त विधान केलं होते. त्यावेळीही त्यांच्यावर टीका झाली होती. त्यानंतर त्यांनी आपले विधान मागे घेतलं होते. त्यांनी माफी मागितली होती.

बागेश्वर धामचे पीठाधीश्वर धीरेंद्र कृष्ण शास्त्री म्हणजेच बागेश्वर बाबा यांनी आता शिर्डीच्या साईबाबांविषयी वादग्रस्त वक्तव्य केले आहे.

"संताची पूजा करायची तर हिंदूंमध्ये संत कमी आहेत का? तुलसीदास, सूरदास किंवा इतर कोणतेही संत असोत ते केवळ महापुरुष आहेत, युगपुरूष आहेत, परंतु ते ईश्वर नाहीत. त्याचप्रमाणे साईबाबा हे संत असू शकतात, फकिर असू शकतात. मात्र, ईश्वर नाही," असे ते म्हणाले.

"शिर्डीच्या साईबाबांची पूजा करावी की नाही," असा प्रश्न एका भक्तांने बागेश्वर बाबांना विचारला होता. त्याला उत्तर देताना त्यांनी हे विधान केलं.

"शंकराचार्य यांनी साई बाबांना ईश्वराचे स्थान दिलेले नाही. शंकराचार्य यांचे मत मानणे अनिवार्य आहे. त्यांच्या मताचे पालन करणे प्रत्येक सनातनी व्यक्तीचे कर्तव्य आहे. कारण शंकराचार्य हे धर्माचे पंतप्रधान आहेत. कोणतेही संत ते आपल्या धर्माचे असोत अथवा दुसऱ्या त्यांना ईश्वराचे स्थान देता येणार नाही," असेही ते म्हणाले.

"गीदड की खाल ओढकर कोई शेर नही बन सकता" (गिधाडाची चामडी पांघरून कोणी सिंह होत नाही.) मला कोणाच्या भावना दुखवायच्या नाहीत. परंतु मी हे बोलणेदेखील गरजेचे आहे," असे ते म्हणाले.