बंगळूर : कर्नाटकात (Karnataka) मुख्यमंत्री बी.एस.येडियुरप्पा (B.S.Yediyurappa) यांना पदावरुन हटवण्यासाठी पक्ष नेतृत्वाने हालचाली सुरू केल्याची चर्चा आहे. या पार्श्वभूमीवर येडियुरप्पांचे पुत्र व राज्य भाजपचे (BJP) उपाध्यक्ष बी.वाय.विजयेंद्र (B.Y.Vijayendra) यांनी दिल्लीत पक्षाचे अध्यक्ष जे.पी.नड्डा (J.P.Nadda) यांची शनिवारी भेट घेतली. त्यानंतर दुसऱ्याच दिवशी नड्डा यांनी येडियुरप्पा यांच्याबाबत मोठं वक्तव्य केलं आहे. (B S Yediyurappa has done a good job say J P Nadda)
जे. पी. नड्डा हे दोन दिवसांपासून गोव्याच्या दौऱ्यावर आहेत. यावेळी पत्रकार परिषदेत बोलताना त्यांना कर्नाटकमधील राजकीय पेचाविषयी प्रश्न विचारण्यात आला. येडियुरप्पा यांच्याविषयी बोलताना नड्डा म्हणाले, कर्नाटक भाजपमध्ये कोणताही वाद नाही. येडियुरप्पा चांगलं काम करत आहेत. येडियुरप्पा हे कर्नाटकची त्यांच्या पध्दतीने चांगली काळजी घेत आहेत. तिथे वाद असल्याचे तुम्हाला वाटत आहे. आम्हाला तसं वाटत नाही, असं नड्डा यांनी स्पष्ट केलं.
काही तासांपूर्वीच युडियुरप्पा यांनीही नेतृत्वबदलाबाबत वक्तव्य केलं होतं. त्यानंतर तासाभरातच नड्डा यांचे हे वक्तव्य आलं आहे. 'सायंकाळपर्यंत पक्षश्रेष्ठींकडून आदेश आल्यानंतर योग्य निर्णय घेतला जाईल,' असे येडियुरप्पा बेळगावी येथे पत्रकारांशी बोलताना म्हणाले होते. येडियुरप्पांच्या राजीनाम्याची चर्चेमुळे राज्यातील राजकीय वातावरण तापले आहे. येडियुरप्पांच्या विरोधात त्यांच्या सहकाऱ्यांनी उघड बंड पुकारले आहे. येडियुरप्पांचे पुत्र विजयेंद्र हे 'सुपरसीएम' असल्याची टीका मंत्रिमंडळातील सहकारी करीत आहेत. शनिवारी विजयेंद्र यांनी नड्डा यांची दिल्लीत भेट घेतली होती. यामुळे येडियुरप्पांचे उत्तराधिकारी विजयेंद्र ठरतील, या मागील काही दिवसांपासून सुरू असलेल्या चर्चेने जोर पकडला आहे.
दरम्यान, भाजपची विधिमंडळ बैठक 25 जुलैला होणार असून, यात येडियुरप्पांच्या भवितव्याचा फैसला होणार आहे. येडियुरप्पांच्या राजीनाम्याबाबत तर्कवितर्क लढवले जाऊ लागले होते. त्यामुळे त्यांनी अखेर मौन सोडले होते. ते म्हणाले होते की, मला पक्षाचे केंद्रीय नेतृत्व 25 जुलैला जो आदेश देईल, त्याचे पालन मी करेन. मी माझे काम 26 जुलैपासून सुरू करेन. राज्यातील भाजप सरकारला 2 वर्षे पूर्ण होत असल्यानिमित्त 26 जुलैला कार्यक्रम होणार आहे. या कार्यक्रमाला हजेरी लावल्यानंतर पक्षश्रेष्ठी देतील त्या आदेशाचे मी पालन करेन.
येडियुरप्पांना हे राज्यातील लिंगायत समाजाचे मोठे नेते आहेत. येडियुरप्पांना राजीनामा देण्यास भाग पाडू नये यासाठी राज्यातील लिंगायत मठांच्या प्रमुखांनी केंद्रातील भाजप नेतृत्वाला उघड इशारा दिला होता. याचबरोबर लिंगायत समाजाच्या काँग्रेस आमदारांनाही भाजपला इशारा दिला होता. यामुळे येडियुरप्पांच्या जागी लिंगायत नेताच मुख्यमंत्री बनावा, असा आग्रह विजयेंद्र यांनी पक्ष नेतृत्वाकडे धरला आहे. राष्ट्रीय स्वयंसेवक संघानेही हीच भूमिका घेतली आहे, अशी माहिती सूत्रांनी दिली.
राज्यात लिंगायत समाजाची लोकसंख्या 16 टक्के असून, या समाजाचा भाजपला पाठिंबा आहे. याचवेळी येडियुरप्पांनाही या समाजातून अधिक मान्यता आहे. येडियुरप्पांना हटवून इतर समाजातील नेता मुख्यमंत्री बनवल्यास भाजपचा हा हक्काचा मतदार दुरावला जाण्याचा धोका आहे. या पार्श्वभूमीवर भाजपकडून लिंगायत नेताच पुन्हा मुख्यमंत्री म्हणून नियुक्त केला जाऊ शकतो, असेही सूत्रांनी स्पष्ट केले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.