बाप रे...एकाच रुग्णाला ब्लॅक, व्हाईट अन् यलो फंगसचा संसर्ग

नवी दिल्ली : कोरोनातून (Covid 19) बरे झालेल्या अनेकांना म्युकरमायकोसिस म्हणजेच ब्लॅक फंगस (Black Fungus) हा आजार होत असल्याने देशाची चिंता वाढू लागली आहे. यातच देशात काही दिवसांपूर्वी व्हाईट फंगस (white fungus) सापडला होता. आता याहीपेक्षा धोकादायक यलो फंगसही आढळला आहे. विशेष म्हणजे एकाच रुग्णाला या तिन्ही फंगसचा संसर्ग झाल्याची धक्कादायक बाब समोर आली आहे. 

महाराष्ट्र, गुजरातसह देशांतील अनेक राज्यांमध्ये म्युकरमायकोसिस आजाराचे रुग्ण वाढू लागले आहेत. या आजारावर वेळीच उपचार न घेतल्यास जीवावर बेतण्याची भीती आहे. रुग्ण वाढू लागल्याने केंद्र सरकारच्या आरोग्य मंत्रालयाने ही बाब गांभीर्याने घेतली आहे. त्यामुळे या आजाराचा समावेश आता इतर साथींच्या आजारामध्ये केला आहे. त्यानुसार साथरोग कायद्यानुसार उपाययोजना राज्यांना केल्या आहेत. 

आता ब्लॅक, व्हाईटनंतर यलो फंगस समोर आला आहे. उत्तर प्रदेशातील गाझियाबादमध्ये यलो फंगसचा पहिला रुग्ण सापडला आहे. धक्कादायक बाब म्हणजे एकाच रुग्णाला ब्लॅक, व्हाईट आणि यलो फंगसचा संसर्ग झाला आहे. यलो फंगस हा पाली आणि इतर सरपटणाऱ्या प्राण्यांमध्ये आढळून येतो. परंतु, आतापर्यंत तो मानवामध्ये आढळला नव्हता. या रुग्णाला अशक्तपणा, चक्कर येणे, ताप आणि सर्दी अशी लक्षणे आहेत. काळजी करण्यासारखे काही नाही लवकरच हा रुग्ण बरा होईल, अशी माहिती उपचार करणारे डॉक्टर बी.पी.त्यागी यांनी दिली. 

हेही वाचा : कुणी लस देता का लस? ग्लोबल टेंडर काढूनही लस मिळेना...

व्हाईट फंगसचा पहिला रुग्ण बिहारमध्ये सापडला होता. हा आजार म्युकरमायकोसिसपेक्षा धोकादायक असल्याचे तज्ञांचे मत आहे. आतापर्यंत बिहारमध्ये व्हाईट फंगसच्या रुग्णांमध्ये एका डॉक्टरचाही समावेश आहे. यानंतर हा व्हाईट फंगस इतर राज्यांतही पसरू लागला आहे. संसर्गजन्य विषाणूप्रमाणे ते आणखी धोकादायक ठरू शकतो, अशी माहिती तज्ञांनी व्यक्त केली आहे. 

व्हाईट फंगस हा शरीरातील महत्वाच्या अवयवांपर्यंत सहजपणे पोचू शकतो. यात फुफ्फुसे, मूत्रपिंडे, आतडे, पोट यांचा समावेश आहे. याचा संसर्ग नखांमधूनही होऊ शकतो. म्युकरमायकोसिसप्रमाणे व्हाईट फंगसही जीवघेणा आहे. गर्भवती आणि लहान मुलांसाठी तो आणखी धोकादायक आहे. कोरोनाप्रमाणेच याची लक्षणे आहेत, अशी माहिती तज्ञांनी दिली. 

Edited by Sanjay Jadhav