Aditya Thackeray News : बिहारमध्ये आदित्य ठाकरेंचे दणक्यात स्वागत

Aditya Thackeray News : शिवसेना (उद्धव बाळासाहेब ठाकरे) पक्षाचे नेते आदित्य ठाकरे (Aditya Thackeray) आज बिहारचे उपमुख्यमंत्री व राष्ट्रीय जनता दलाचे नेते तेजस्वी यादव (Tejashwi Yadav) यांची भेट घेणार आहेत.

आदित्य ठाकरे यांचे पटणा येथील विमानतळावर शिवसैनिकांनी जोरदार स्वागत केले. फुलांची उधळण करत, फटाक्यांची आतिशबाजी करत शिवसैनिकांनी उत्साहात आदित्य यांचे स्वागत केले. आदित्य यांच्यासोबत शिवसेनेच्या (Shivsena) खासदार प्रियंका चतुर्वेदी, त्यांच्यासोबत खासदार अनिल देसाई (Anil Desai), प्रियंका चतुर्वेदी हे नेतेही उपस्थित आहेत.

आदित्य ठाकरे, तेजस्वी यादव यांच्या निवासस्थानी दाखल झाले आहेत. येथे दोन्ही नेत्यांमध्ये चर्चा होणार आहे. आदित्य आणि तेजस्वी यादव यांच्या भेटीमागे मुंबई महापालिकेच्या निवडणुकीचा संदर्भ असल्याचे सांगण्यात येत आहे. उत्तर भारतीय मतांची मोठी संख्या मुंबईमध्ये आहे. शिवसेनेतून बाहेर पडत एकनाथ शिंदे यांनी भाजप सोबत सरकार स्थापन केले आहे. त्यानंतर मुंबई महापालिका निवडणूक भाजपनेही प्रतिष्ठेची केली आहे. त्यामुळे शिवसेनेकडूनही या निवडणुकीसाठी रणनीती आखण्यात येत आहे.

त्याच पार्श्वभूमिवर आदित्य यांची ही बिहार भेट असल्याचे सांगण्यात येत आहे. तसेच तेजस्वी यादव यांनी भाजपच्या विरोधात थेट भूमिका घेतली आहे. त्यातच महाराष्ट्रातील सत्तांतरानंतर ठाकरेही भाजपच्या विरोधात ठामपणे उभे ठाकले आहेत. त्यामुळे भाजप विरोधकांना एकत्र करण्यासाठीही ही भेट महत्त्वाची असल्याचे सांगण्यात येत आहे.