शशिकला यांना उच्च न्यायालयाचा झटका; पक्षात परतण्याच्या प्रयत्नांना खीळ

चेन्नई : तमिळनाडूच्या (Tamil Nadu) माजी मुख्यमंत्री जयललिला (Jayalalithaa) यांच्या निकटवर्ती सहकारी व्ही. के. शशिकला (V.K.Sasikala) यांना पुन्हा एकदा जोरदार झटका बसला आहे. अण्णाद्रमुक पक्षाच्या महासचिव पदी पुन्हा नियुक्ती करण्याची मागणी शशिकला यांनी चेन्नई उच्च न्यायालयात (High Court) केली होती. ही याचिका न्यायालयाकने फेटाळून लावली आहे. त्यामुळे पुन्हा पक्षावर वर्चस्व राखण्याचा त्यांचा प्रयत्न असफल ठरला आहे.

जयललितांना पक्ष कार्यकर्ते अम्मा तर शशिकलांनी चिन्नम्मा असे संबोधत. जयललितांच्या मागे शशिकला या कायम सावलीसारख्या असत. जयललितांच्या निधनानंतर डिसेंबर 2016 मध्ये शशिकलांनी पक्षासह सरकार ताब्यात घेतले होते. पक्षात त्यांच्याकडे महासचिवपद देण्यात आले होते. परंतु, 15 फेब्रुवारी 2017 रोजी त्यांना बेहिशेबी मालमत्ता प्रकरणात त्यांना चार वर्षांची शिक्षा झाली. त्यानंतर सप्टेंबर 2017 मध्ये त्यांच्या हातातून पक्ष आणि सरकार निसटले होते. पक्षाने त्यांना पदावरून हटवलं. पण त्यानंतर त्या या पदावर दावा सांगत होत्या.

शशिकला यांनी तुरूंगातून सुटून आल्यानंतर पक्षात पुन्हा सक्रीय होण्याचे संकेत दिले होते. त्यानुसार त्यांनी नुकतीच न्यायालयाच्या पक्षाच्या निर्णयाविरोधात याचिका केली होती. पक्षाचा निर्णय बेकायदेशीर असल्याचा दावा त्यांनी केला होता. पण न्यायालयाने त्यांची ही याचिका फेटाळून लावली. त्यामुळे शशिकला यांना धक्का बसला आहे. पक्षात पुन्हा येण्याचा त्यांचा मार्ग बंद झाल्याची सुरू झाली आहे.

दरम्यान, शशिकला आणि त्यांचे भाचे टी.टी.व्ही. दिनकरन यांना पुन्हा अण्णाद्रमुकमध्ये घ्यावे, असा ठराव अण्णाद्रमुकच्या नेत्यांनी नुकताच मांडला आहे. पक्षाच्या थेनी येथे झालेल्या बैठकीत हा ठराव मंजूर करण्यात आला. खुद्द पनीरसेल्वम यांच्या नेतृत्वाखाली झालेल्या बैठकीत हा ठराव मांडण्यात आला. राज्यात नुकत्याच झालेल्या स्थानिक स्वराज संस्था निवडणुकीत अण्णाद्रमुकला पराभवाचा धक्का बसला आहे.

अण्णाद्रमुकचे दोन गट असून, पनीरसेल्वम गट आता शशिकलांच्या मागे उभा राहिला आहे. माजी मुख्यमंत्री एडापाडी पलानीस्वामी यांचा गट आता यावर काय भूमिका घेतो, याकडे लक्ष लागले आहे. पक्षाच्या सुवर्णमहोत्सवानिमित्त शशिकलांनी गेल्या वर्षी 17 ऑक्टोबरला पक्षाचे संस्थापक व माजी मुख्यमंत्री एम.जी.रामचंद्रन यांच्या स्मारकाच्या ठिकाणी पक्षाचा ध्वज फडकावला होता. तेथे एका कोनशिलेचे अनावरणही शशिकलांनी केले होते. त्यावर त्यांचा उल्लेख पक्षाच्या सरचिटणीस असा करण्यात आला होता.

विशेष म्हणजे अण्णाद्रमुक पक्षाचा सुवर्णमहोत्सव साजरा होण्याच्या एक दिवस आधी गेल्या वर्षी 16 ऑक्टोबरलला अण्णाद्रमुकचा ध्वज लावलेल्या मोटारीतून शशिकला या मरिना बीचवर पोचल्या होत्या. त्यावेळी कार्यकर्त्यांनी त्यांचे जोरदार स्वागत केले होते. त्यांना जयललितांसोबत माजी मुख्यमंत्री एम.जी.रामचंद्रमन आणि अण्णादुराई यांच्या स्मारकालाही भेट देऊन आदरांजली वाहिली. त्यावेळी मोठ्या प्रमाणात अण्णाद्रमुकचे कार्यकर्ते उपस्थित होते. यातून त्यांनी माजी मुख्यमंत्री ओ.पनीरसेल्वम आणि पलानीस्वामी या दोन्ही गटांना इशारा दिल्याचे मानले जात होते.