नाशिक : महाराष्ट्र प्रदेश काँग्रेसतर्फे आगामी लोकसभा व विधानसभा निवडणुकीच्या तयारीसाठी आता उत्तर महाराष्ट्रावर लक्ष केंद्रीत करण्यात आले आहे. त्यासाठी लवकरच मोठी संपर्क मोहीम राबविली जाणार आहे. यासंद्रभात उद्या (ता.20) अखिल भारतीय काँग्रेस कमिटीचे सचिव तथा आमदार चेल्ला वामसी चांद रेड्डी यांच्या उपस्थितीत दोन दिवसीय बैठक होणार आहे.
आगामी लोकसभा व विधानसभा निवडणुकीचा जिल्हानिहाय आढावा बैठकीत घेतला जाणार आहे. बूथ कमिट्या, जनसंपर्क अभियान, पक्षातर्फे आयोजित प्रशिक्षण शिबिरे व वेगवेगळे कार्यक्रम याबाबत आढावा घेतला जाणार आहे. आगामी निवडणुकीत काँग्रेस पक्षाची रणनीती बैठकीत आखण्यात येणार असल्याची माहिती पानगव्हाणे यांनी दिली आहे. शुक्रवारी युवक काँग्रेस, एनएसयूआय व महिला काँग्रेस यांची बैठक होणार आहे.
या बैठकीनंतर लगेचच जिल्हानिहाय समस्यांवर लक्ष केंद्रीत करुन संपर्क मोहीम होईल. मुख्यमंत्र्यांनी दत्तक घेतलेल्या नाशिक महापालिकेची असह्य करवाढ, रखडलेली विकासकामे, पालकमंत्र्यांचे जिल्ह्याकडे झालेले दुर्लक्ष, काँग्रेस आघाडी सरकारच्या काळातील विकासकामे आणि सध्याच्या काळातील रखडलेली कामे यांची तुलना, आदिवासी भागातील विकासकामांकडे झालेले दुर्लक्ष याकडे लक्ष वेधले जाणार आहे.
बैठकीला प्रदेश काँग्रेसचे उपाध्यक्ष तथा जिल्हा प्रभारी के. सी. पाडवी, सहप्रभारी डी. जी. पाटील, आमदार निर्मला गावित, डॉ. सुधीर तांबे, माजी आमदार जयप्रकाश छाजेड, माजी मंत्री शोभा बच्छाव, माजी आमदार शिरीषकुमार कोतवाल यांसह प्रमुख नेते उपस्थित राहणार आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.