नेते पक्ष सोडून का चालले?  यावर आत्मचिंतन करावे; मुख्यमंत्र्यांचा शरद पवारांना टोला 

नागपूर : राष्ट्रवादी कॉंग्रेसमधून अनेकजण बाहेर पडत आहेत. कुणी त्या पक्षात राहायला तयार नाही. यावर पक्षाचे राष्ट्रीय अध्यक्ष शरद पवार यांनी आत्मचिंतन करावे, असा सल्ला देत मुख्यमंत्री देवेंद्र फडणवीस यांनी आज त्यांना टोला लगावला. राष्ट्रवादीचे आणखी काही नेते भाजपमध्ये येणार असल्याचे स्पष्ट संकेत त्यांनी यावेळी दिले. 

सध्या भाजपमध्ये कॉंग्रेस व राष्ट्रवादी कॉंग्रेसच्या नेत्यांचा पूर आला आहे. यात राष्ट्रवादी कॉंग्रेसला मोठ्या प्रमाणात खिंडार पडले. राष्ट्रवादीतील चित्रा वाघ, मधुकर पिचड, सचिन पिचड, अशी मोठी यादी भाजपमध्ये जाणाऱ्यांची आहे. शरद पवार यांनी दबावतंत्राचा वापर केल्याचा आरोप मुख्यमंत्र्यांवर केला. यावर मुख्यमंत्री देवेंद्र फडणवीस यांनी नागपुरात सिम्बॉयसिस विद्यापीठ कॅम्पसच्या उद्‌घाटनानंतर पत्रकारांशी बोलताना टोलेबाजी केली. 

यावेळी मुख्यमंत्री म्हणाले, ''भाजपला कुणाच्याही मागे धावण्याची गरज नाही. साखर कारखाने तसेच सहकार क्षेत्रातील अडचणीबाबत सरकारने या नेत्यांना मदत केली. त्यामुळे आज ते भाजपमध्ये येत आहे. कॉंग्रेस आणि राष्ट्रवादीचे अनेक आमदार भाजपात येण्यास इच्छुक आहेत, पण त्यातून काही निवडक लोकच घेणार आहोत, ज्यांच्यावर ईडीची कारवाई सुरू आहे अशा कोणालाही भाजप आपल्या पक्षात घेणार नाही. आम्हाला आशा लोकांची गरज नाही. दबाव टाकून पक्षात या हे म्हणण्याची आता भाजपवर वेळ राहिली नाही. भाजपकडे जनाधार आहेत, पंतप्रधान नरेंद्र मोदी यांच्यासारखे नेते आहेत. त्यामुळे लोकच आता भाजपात येतात, जे चांगले आहेत, लोकाभिमुख कामे करतात त्यातल्या निवडक लोकांना पक्षात घेतले जाईल. ज्यांना दुसऱ्या पक्षात जायचं ते जातील,'' भाजपने कधीही सूडाचे राजकारण केले नाही, असेही त्यांनी स्पष्ट केले.