नवीन वर्षात 52 नद्यांत शुद्धीकरण मोहीम : रामदास कदम

नवीन वर्षात 52 नद्यांत शुद्धीकरण मोहीम : रामदास कदम

मुंबई : नवीन वर्षात राज्यातील 52 नद्यांचे शुद्धीकरण मोहिमेचे काम सुरु होणार असल्याचे पर्यावरणमंत्री रामदास कदम यांनी सांगितले. ते आज महाराष्ट्र प्रदूषण नियंत्रण मंडळ प्रस्तुत लोकसत्ता इकोफ्रेंडली घरगुती गणेशोत्सव स्पर्धेच्या पारितोषिक वितरण कार्यक्रमात बोलत होते. हा कार्यक्रम यशवंतराव चव्हाण सेंटर येथे पार पडला.


श्री. कदम म्हणाले, अलीकडेच चंद्रभागा नदी स्वच्छ केली. या मोहिमेत जवळपास 500 नागरिक आणि अधिकारी सहभागी झाले होते. लवकरच तेथील गाळ काढणार आहोत. चंद्रभागेत आजूबाजूच्या 121 गावांचे सांडपाणी सोडले जाते. ते अडवणार आहोत. त्यासाठी 20 कोटी रुपये दिले आहेत. नदीकाठी भक्तांसाठी स्वच्छतागृहे, आंघोळीसाठी घाट बांधणार आहोत.
कचऱ्यापासून खत निर्माण करण्यासंदर्भात श्री. कदम म्हणाले, राज्यातील 227 नगरपरिषदा आणि 27 महानगरपालिका क्षेत्रातील कचरा आणि शेण एकत्र करुन सेंद्रीय खत निर्माण करणार आहोत. हे खत शेतकऱ्यांना वितरित केले जाणार आहे. त्यामुळे नागरिकांना रासायनिक खते वापरुन उगवलेल्या धान्यापासून मुक्ती मिळेल.

प्लास्टिक बंदीचा निर्णय यशस्वी झाल्यानंतर भीमा, गोदावरी, पंचगंगा, उल्हास, मीठी या व इतर जवळपास 52 नद्यांचे शुद्धीकरण करण्याची मोहीम पर्यावरण विभागाने हाती घेतली आहे, असेही ते म्हणाले.

प्रधान सचिव अनिल डिग्गीकर म्हणाले, पर्यावरणाचे संतुलन बिघडल्याने जगभर प्रलयकारी घटना घडत आहेत. तापमान वाढ, सुनामी, महापूर ही उदाहरणे आहेत. राज्यात सुरु असलेल्या प्लास्टिक बंदीला 90 टक्के प्रतिसाद मिळाला असून पुढच्या सहा महिन्यात संपूर्ण प्लास्टिक बंदी होईल, असा विश्वास त्यांनी व्यक्त केला. याच कार्यक्रमात उद्योग विभागाचे मुख्य कार्यकारी अधिकारी डॉ. पी. अन्बलगन, प्रदूषण नियंत्रण मंडळाचे सदस्य सचिव ई. रविंद्रन यांचीही भाषणे झाली.

या कार्यक्रमात श्री. कदम यांच्या हस्ते इकोफ्रेंडली घरगुती गणपती स्पर्धेतील विजेत्यांना पारितोषिके देण्यात आली. प्रारंभी कार्यक्रमाचे प्रास्ताविक दिनेश गुणे यांनी केले. प्रदूषण नियंत्रण महामंडळाचे जनसंपर्क अधिकारी संजय भुस्कुटे यांनी आभार मानले.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com