"बिद्री' कारखान्यात चंद्रकांतदादांना एवढा रस का ?

या आघाडीचा सार्वत्रिक निवडणुकीत परिणाम होण्याची शक्‍यता नाही. विरोधात निवडून आलेले सत्ताधीशांच्या मांडीवर कधी जाऊन बसतात हे कळतही नाही. "गोकुळ' मध्ये त्याचे ज्वलंत उदाहरण अमरिश घाटगे यांच्या रूपाने पहायला मिळत आहे
 "बिद्री' कारखान्यात चंद्रकांतदादांना एवढा रस का ?

कोल्हापूर : राज्यात भारतीय जनता पार्टीचा राष्ट्रवादी कॉंग्रेस हा कट्टर विरोधी पक्ष आहे. राष्ट्रवादीतील दिग्गजांच्या मागे सरकारने चौकशीचा ससेमिरा लावला आहे. माजी उपमुख्यमंत्री छगन भुजबळ यांना पोलीस कोठडीची हवा खायला सरकारने लावले. त्याच राष्ट्रवादीच्या जिल्ह्यातील नेत्यांबरोबर पालकमंत्री तथा महसूल मंत्री चंद्रकांतदादा पाटील यांचा दोस्ताना आहे. स्वच्छ प्रतिमा व पारदर्शक कारभार असलेल्या दादांचा "बिद्री' त एवढा इंटरेस्ट काय असा प्रश्‍न राजकीय क्षेत्राला पडला आहे. 

चार तालुक्‍यातील भाजपाची ताकद आपल्यामागे रहावी या उद्देशाने राष्ट्रवादीचे नेते आमदार हसन मुश्रीफ, माजी आमदार के. पी. पाटील यांचे प्रयत्न सुरू आहेत. त्यातून या दोघांचीही पालकमंत्री पाटील यांच्याशी गट्टी नक्की आहे. मात्र पक्ष व स्वतःच्या प्रतिमेपेक्षा कारखाना किती महत्त्वाचा ? हाही सवाल यातून उपस्थित होतो. 
या निवडणुकीच्या निमित्ताने राष्ट्रवादी व पालकमंत्री पाटील यांच्यासह भाजपाचे नेते एका व्यासपीठावर येतील. एकमेकांवर स्तुतीसुमनांचा वर्षाव सभांत होईल. कारण, एकत्र आलो म्हटल्यावर टीका टिप्पणी करता येणार नाही. ही स्तुतीसुमने मतदारांना मान्य होणार का ? 

राज्यात भाजपाचे सरकार आल्यापासून संधी मिळेल तिथे श्री. मुश्रीफ यांनी पालकमंत्री पाटील यांच्यावर टीकेची एकही संधी सोडलेली नाही. नोटबंदीच्या काळात जिल्हा बॅंकेतील व्यवहारच दादांनी बोट ठेवले होते. त्याला प्रत्युत्तर म्हणून श्री. मुश्रीफ यांनी "पार्श्‍वनाथ' चा विषय काढताच त्यांची टीका थांबली. राष्ट्रवादीच्यावतीने शेतकऱ्यांचा भव्य मोर्चा पालकमंत्री यांच्या घरावर नेणारे मुश्रीफ या निवडणुकीत दादांना कसे चालतात ? 

या आघाडीचा सार्वत्रिक निवडणुकीत परिणाम होण्याची शक्‍यता नाही. विरोधात निवडून आलेले सत्ताधीशांच्या मांडीवर कधी जाऊन बसतात हे कळतही नाही. "गोकुळ' मध्ये त्याचे ज्वलंत उदाहरण अमरिश घाटगे यांच्या रूपाने पहायला मिळत आहे. निवडणुकीत के. पी. यांचा विजय झाला तरी कारभाराची सुत्रेही त्यांच्याकडेच राहतील. त्यामुळे कारभारात काय सुधारणा करायची म्हटले तरी ते शक्‍य नाही. या निवडणुकीत भाजपाला वेगळ्या पध्दतीचे राजकारण करता आले असते, मग एवढे ओढून ताणून राजकारण करण्याची गरज आहे ? असाही प्रश्‍न आहे. 

राजकारणात सगळे माफ पण...... 
प्रेमात, युध्दात व राजकारणात सर्व काही माफ असते असे म्हणतात. पण राजकारण करत असताना लज्जा रहात नाही एवढे तरी वस्त्र अंगावर ठेवले जाणार का नाही ? हा या निमित्ताने प्रश्‍न आहे. कारखान्याच्या सभासदांनाही ही युती खटकणारच आहे. त्यातून दादा व राष्ट्रवादीचे नेते कसा मार्ग काढणार हे महत्त्वाचे आहे. 


 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com