भाजप बंडखोराचा मोदी-खडसेंचे फोटो होर्डिंगवर लावून राजरोस प्रचार

बुलडाणा  :  भाजप बंडखोर उमेदवार योगेंद्र गोडेयांनी  माजी महसुलमंत्री एकनाथरव खडसे व पंतप्रधान नरेंद्र मोदी यांचे फोटोच पोस्टर्वर लावून राजरोस प्रचार सुरु केल्याने बुलडाणा मतदारसंघात युतीची ऐशी की तैशी झाली आहे . 

बुलडाणा विधानसभा मतदार संघात  भाजपचे तत्कालीन विधानसभा क्षेत्रप्रमूख योगेंद्र गोडे अपक्ष निवडणूक लढवत आहेत. त्यांच्या प्रचार बॅनरवर पंतप्रधान नरेंद्र मोदी व माजी महसूलमंत्री एकनाथराव खडसे यांचे फोटो आहेत. पान्हा चिन्ह घेऊन उभ्या राहिलेल्या गोडेंविषयी या फोटोंमुळे मतदारांना आपुलकीचा पान्हा फुटतो का हे  लवकरच कळणार आहे . 

 शिवसेनेचे संजय गायकवाड हे अधिकृत उमेदवार आहेत. तर गेल्या पंचवार्षिकला भाजपचे उमेदवार असलेले योगेंद्र गोडे हे यावर्षी देखील इच्छुक उमेदवार होते. मात्र, त्यांची उमेदवारी रद्द झाल्याने गोडे अपक्ष उमेदवार म्हणून निवडणूक रिंगणात आहेत. 

त्यांच्या प्रचार बॅनरवर पंतप्रधान नरेंद्र मोदी आणि भाजपचे नेते एकनाथ खडसे यांचे फोटो असलेले बॅनर बुलडाणा मतदार संघातील मोताळा शहरात लावण्यात आले आहेत. यामुळे राजकीय वर्तुळात एकच खळबळ उडाली आहे. 

युतीमधे भाजपला जागा न सुटल्याने योगेंद्र गोडे यांना नाईलाजाने राजीनामा द्यावा लागला. पक्षात नसले तरी मनापासून ते भाजपातच आहेत. यामुळे भाजप व संघपरिवारचा आपल्यालाच पाठिंबा आहे हे दर्शविण्यासाठी योगेंद्र गोडे यांनी ही शक्कल लढवली आहे असे मानले जात आहे .