धक्कादायक : महात्मा गांधी जयंतीलाच नथुराम गोडसे जिंदाबाद!

मुंबई : महात्मा गांधींच्या (Mahatma Gandhi) जयंतीदिनीच त्यांची हत्या करणाऱ्या नथुराम गोडसेचा (Nathuram Godse) उदोउदो केला जात असल्याचा धक्कादायक प्रकार समोर आला आहे. नथुराम गोडसेच्या समर्थनार्थ ट्विटरवर 'नथुराम गोडसे जिंदाबाद' असा हॅशटॅग ट्रेंड होत असल्याने खळबळ उडाली आहे. यावर तीव्र प्रतिक्रिया व्यक्त करीत काँग्रेसने हा हॅशटॅग हटवून ट्रेंड करणाऱ्यांचे अकाऊंद बंद करावेत, अशी मागणी केली आहे.

गांधीच्या जयंतीदिनी आज पंतप्रधान नरेंद्र मोदींसह अनेक नेत्यांनी त्यांना आदरांजली वाहिली. देशभरात गांधी जयंतीनिमित्त अनेक कार्यक्रम होत असताना ट्विटरवर अचानक नथुराम गोडसे जिंदाबाद हा हॅशटॅग ट्रेंड होऊ लागल्याने अनेकांना धक्का बसला. काँग्रेस नेत्या व महिला व बाल कल्याण मंत्री यशोमती ठाकूर यांनी याला आक्षेप घेतला आहे. त्यांनी ट्विटरवर म्हटले आहे की, नथुराम गोडसे हा देशातील पहिला दहशवादी आहे. त्याच्या समर्थनार्थ ट्विटरवर सुरू असलेले ट्रेंड ब्लॉक करावेत. या ट्रेंडमध्ये सामील झालेल्यांचे अकाऊंटही बंद करावेत.

महात्मा गांधींची हत्या 30 जानेवारी 1948 करण्यात आली. गांधी हत्येच्या 10 दिवस आधीही त्यांच्या हत्येचा एक अयशस्वी प्रयत्न झाला होता. भारताची फाळणी आणि पाकिस्तानला 55 कोटी रुपये देण्याच्या निर्णयाची या प्रयत्नामागे पार्श्वभूमी होती. गांधीजींच्या प्रार्थना सभेत 20 जानेवारी 1948 ला बाँब फेकण्यात आला होता. त्यावेळी मदनलाल पहावा नावाच्या शरणार्थ्याने फेकलेला बाँब गांधीजींपासून थोड्याच अंतरावर फुटला होता. यात कोणाला दुखापत झाली नव्हती पण सभेत गोंधळ उडाला. नंतर मदनलालने दिलेल्या कबुलीजबाबावरून तो कट होता हे समोर आले होते.

या कटात सहभागी असलेल्यांची नावे त्याने सांगितली होती. नथुराम गोडसे आणि नारायण आपटे कटाचे सूत्रधार होते तर विष्णू करकरे, शंकर किश्तया आणि दिंगबर बडगे यांचा त्यात सहभाग होता. त्यानंतर नथुराम गोडसेने कोणाच्याही मदतीशिवाय मी गांधीहत्या करणार, असे गटातील सहकाऱ्यांना सांगितले होते. दरम्यान, यासाठी एक दिवस आधी नथुराम आणि आपटे 29 जानेवारी 1948 रोजी दिल्लीत पोचला होता. प्रार्थनेसाठी येत असलेल्या गांधीजींवर गोडसेने 30 जानेवारी 1984 रोजी गोळ्या झाडल्या. यातच गांधीजींची प्राणज्योत मालवली.