प्रसंगी 'गोकुळ' स्वबळावर लढणार

कोल्हापूर : कोल्हापूर जिल्हा दूध उत्पादक संघाच्या (गोकुळ) निवडणुकीत सद्यस्थितीत सत्ताधाऱ्यांसोबत आपण राहू पण त्यांनी सन्मान दिला नाही तर प्रसंगी स्वबळावरही निवडणूक लढवण्याचा निर्णय भाजपाचे प्रदेशाध्यक्ष चंद्रकांत पाटील यांच्या अध्यक्षतेखाली झालेल्या बैठकीत घेण्यात आला.

भाजपाच्या जिल्हाध्यक्षपदाच्या निवडीसाठी पक्षाच्या प्रमुख कार्यकर्त्यांची एक बैठक आज झाली. या निवडीनंतर श्री. पाटील यांच्या अध्यक्षतेखाली "गोकुळ' च्या निवडणुकीबाबत बैठक झाली. बैठकीला माजी खासदार धनंजय महाडिक, माजी आमदार सुरेश हाळवणकर, अमल महाडिक, 'गोकुळ' चे संचालक बाबा देसाई, जिल्हा परिषदेच्या माजी अध्यक्षा सौ. शौमिका महाडिक आदि उपस्थित होते.

या बैठकीत तालुकानिहाय "गोकुळ' च्या निवडणुकीचा आढावा घेण्यात आला. त्यात सद्यस्थिती आपण सत्ताधाऱ्यांसोबत जाऊ, त्यांनी आपला सन्मान नाही केला तर प्रसंगी ही निवडणूक स्वबळावर लढवण्याची तयारी ठेवा, असे आवाहन श्री. पाटील यांनी केले. भाजपाने स्वबळावर लढण्याचा निर्णय घेतला तर यश कितपत मिळेल यापेक्षा त्याचा तोटा कोणाला होईल, याचा विचार भाजपासोबत चर्चा करताना सत्ताधाऱ्यांनी करावा, अशीही अपेक्षा या बैठकीत व्यक्त करण्यात आली. ठराव प्रक्रिया संपल्यानंतर या निवडणुकीबाबत अंतिम निर्णय घेण्याचे यावेळी ठरले.