औरंगाबाद महापालिकेच्या सर्व 115 वॉर्डात स्वबळावर लढण्याची तयारी करा - बाळासाहेब थोरात

औरंगाबाद महापालिकेच्या सर्व 115 वॉर्डात स्वबळावर लढण्याची तयारी करा - बाळासाहेब थोरात

औरंगाबाद : महापालिकेच्या 115 वॉर्डांमधून लढण्याची तयारी करा असे आदेश राज्याचे महसुलमंत्री तथा कॉंग्रेसचे प्रदेशाध्यक्ष बाळासाहेब थोरात यांनी औरंगाबादेतील कॉंग्रेस पदाधिकाऱ्यांना दिले आहेत. एप्रिलमध्ये होणाऱ्या महापालिका निवडणुका शिवसेना-राष्ट्रवादीसोबत न जाता स्वबळावर लढा अशी मागणी घेऊन मुंबईत दाखल झालेल्या पदाधिकाऱ्यांना तुर्तास सगळ्या जागा लढण्याच्या दृष्टीने तयारीला लागा अशा सूचना देण्यात आल्या आहेत. 

आगामी महापालिका निवडणुकीच्या पार्श्‍वभूमीवर नुकतीच कॉंग्रेस पदाधिकाऱ्यांची महत्वाची बैठक गांधी भवनात पार पडली होती. या बैठकीत भ्रष्टाचाराने बरबटलेल्या शिवसेनेसोबत न जाता स्वबळावर लढण्याची मागणी बहुतांश पदाधिकारी, कार्यकर्त्यांनी केली होती. हीच मागणी घेऊन आज मुंबईत प्रदेशाध्यक्ष बाळासाहेब थोरात यांच्या सोबत जिल्ह्यातील कॉंग्रेस पदाधिकाऱ्यांची महत्वाची बैठक पार पडली. 

सुत्रांनी दिलेल्या माहितीनूसार या बैठकीत दोन मतप्रवाह दिसून आले. कॉंग्रेसमधील एका गटाने महाविकास आघाडी म्हणून महापालिका निवडणुकांना आपण समोर गेले पाहिजे असे मत व्यक्त केले. तर दुसऱ्या गटाने मात्र स्वबळावर लढण्याची मागणी केली. पदाधिकाऱ्यांचे म्हणणे ऐकून घेतल्यानंतर बाळासाहेब थोरात यांनी महापालिकेच्या सर्व 115 वॉर्डांमधून लढण्याची तयारी करा असे निर्देश दिले. 

तसेच एका वॉर्डासाठी अकरा जणांची समिती नेमून त्या त्या वार्डातील समस्या, इच्छूक उमेदवारांची नावे, त्याने जनतेची केलेली कामे आधीची माहिती आणि यादी तयार करण्यास सांगण्यात आले आहे. पुढील महिन्यात हा सर्व अहवाल कॉंग्रेस प्रदेश कमिटीकडे पाठवावा. त्यानंतर महापालिका निवडणूक स्वबळावर लढायची की महाविकास आघाडी म्हणून यावर अंतिम निर्णय घेण्यात येईल असेही बाळासाहेब थोरात यांनी बैठकीत स्पष्ट केल्याची माहिती आहे. 

गांधी भवनात झालेल्या बैठकीत शिवसेनेने सत्ताकाळात महापालिकेत केलेल्या भ्रष्टाचाराचा मुद्दा महापालिका निवडणुकीत पुढे करून आक्रमक भूमिका स्वीकारावी, आणि स्बळावर निवडणूक लढवावी अशी आग्रही मागणी पदाधिकाऱ्यांसह कॉंग्रेस कार्यकर्त्यांनी स्थानिक नेत्यांकडे केली होती. या पार्श्‍वभूमीवर आज मुंबईतील बैठकीत काय निर्णय होतो याकडे सगळ्यांचे लक्ष लागले होते. 
 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com