Buldhana Accident News: काळाचा घाला...! सिंदखेडराजा येथे ट्रक-एसटीचा भीषण अपघात, ८ जणांचा मृत्यू तर...

Sindkhedraja Accident News: समृद्धी महामार्ग हा मृत्यूचा सापळा बनत असल्याची चर्चा जोर धरु झाली आहे. हा महामार्ग सुरू झाल्यापासून मागील चार महिन्यांत 253 रस्ते अपघात झाले आहेत. ज्यात 28 जणांना जीव गमवावा लागला आहे. याचदरम्यान, मुंबई नागपूर जुन्या महामार्गावर सिंदखेडराजा येथे ट्रक आणि एसटीच्या भीषण अपघातात आठ जण ठार झाले आहेत. तर १३ जण गंभीर जखमी झाले असल्याची माहिती समोर येत आहे.

सिंदखेडराजा(Sindkhedraja) जवळ पळसखेड चमकत या गावाजवळ मंगळवारी(दि.२३) हा भीषण अपघात घडला. संभाजीनगरहून वाशिमकडे ही एसटी बस जात होती. याचवेळी भरधाव ट्रक आणि बसची धडक झाली. या अपघातात ८ जणांचा दुर्दैवी अंत झाला तर १३ जण जखमी झाले आहेत. त्यापैकी पाच जणांची प्रकृती चिंताजनक आहे. जखमींवर सिंदखेडराजा ग्रामीण रुग्णालयात उपचार सुरु करण्यात आले आहेत.

काय घडलं ?

मुंबई-संभाजीनगर-नागपूरच्या जुन्या महामार्गाजवळ हा अपघात झाला. ही बस संभाजीनगरहून वाशिमच्या दिशेने निघाली होती. त्याचवेळी आज सकाळी ६.१५ च्या दरम्यान ट्रक आणि बसची जोरदार धडक झाली. या अपघातात बसचा चालक जागीच ठार झाला आहे. अपघाताच्या ठिकाणी पोलीस दाखल झाले आहेत. तसंच मदत आणि बचावकार्य सुरु करण्यात आलं आहे.मात्र, वेळेवर मदत न मिळाल्यानं काही जणांना प्राण गमवावा लागला असल्याची माहिती प्रत्यक्षदर्शनीनं दिली आहे. (Latest Marathi News)

अपघातांमागे पोलिसांचा 'हा' निष्कर्ष...

समृद्धी महामार्गा(Samruddhi Mahamarg)वर वाहन चालवतांना चालकांना डुलकी आणि थकव्यामूळे सर्वाधिक अपघात होत असल्याचा निष्कर्ष महामार्ग पोलिसांनी काढला आहे. याचवेळी गेल्या पाच महिन्यातील अपघाताच्या सर्वेक्षणानंतर डुलकी आणि थकव्यामूळे सर्वाधिक ९८ अपघात झाले असल्याची धक्कादायक बाब समोर आली आहे.

महिला पोलीस अधिकाऱ्याचाही दुर्दैवी अंत

समृद्धी महामार्गावर नुकत्याचं झालेल्या अपघातात हरियाणाच्या महिला पोलीस निरीक्षक नेहा चौहान यांचा मृत्यू झाला. 29 एप्रिल रोजी त्यांची टीम मराठवाडा विभागातील परभणी येथून परत येत असताना त्यांचा मृत्यू झाला होता. वर्धा जिल्ह्यात ही दुर्घटना घडली.

(Edited By Deepak Kulkarni)