मला चक्रव्यूह भेदता येते.. पंकजा मुंडेंचा विरोधकांना इशारा... - I can destroy the maze .. Pankaja Munde's warning to the opponents | Politics Marathi News - Sarkarnama

मला चक्रव्यूह भेदता येते.. पंकजा मुंडेंचा विरोधकांना इशारा...

दत्ता देशमुख
रविवार, 25 ऑक्टोबर 2020

सावरगाव घाट (ता. पाटोदा) या राष्ट्रसंत भगवानबाबा यांच्या जन्मगावी यंदा कोरोनामुळे ऑनलाईन दसरा मेळावा झाला. यात पंकजा मुंडे यांनी आगामी वाटचालीची दिशा स्पष्ट केली.

बीड : मला तोडण्याचा प्रयत्न झाला, मी राजकारण सोडलं, घरात बसले असा अपप्रचार करण्यात आला. मात्र,  मी शर्यतीत असेन आणि तोडणाऱ्यांनाही उत्तर देईन. अभीमन्यूला अर्धज्ञान असल्याने तो चक्रव्युवाहत अडकला. मात्र, मला चक्रव्युह तोडता येते, असा हल्लाबोल करतांनाच हा मेळावा एकदिवस शिवतिर्थाव घेणार, असा निर्धार भाजपच्या राष्ट्रीय सचिव पंकजा मुंडे यांनी केला.

राष्ट्रसंत भगवानबाबा यांच्या जन्मगावी सावरगाव घाट येथील दसरा मेळाव्यात पंकजा मुंडे बोलत होत्या. यंदा कोरोना विषाणू संसर्गामुळे ऑनलाईन मेळावा झाला. यावेळी खासदार भागवत कराड, माजी मंत्री महादेव जानकर, आमदार मोनिका राजळे, मेघना बोर्डीकर, भिमराव धोंडे, रमेशराव आडसकर, अक्षय मुंदड, केशव आंधळे आदी उपस्थित होते. 

पंकजा मुंडे म्हणाल्या, नुकसानभरपाईपोटी सरकारने जाहीर केलेल्या पॅकेजचे स्वागत व अभिनंदन. मात्र, हे पॅकेज पुरेसे नाही, एवढ्या मदतीने शेतकऱ्यांची दिवाळी गोड होणार नाही,मायबाप सरकारने उदारता दाखवावी, अन्यथा रस्त्यावर उतरु. ऊसतोडणी कामगारांच्या संघटना आपल्यासोबतच असून दोन बैठकांत मिटणारा प्रश्न दोन महिने का लांबला. मुंबईत बसून निर्णय होत नाहीत तर ढाब्यावर बसून होतात का, असा सवालही त्यांनी केला.

आपली खासदार शरद पवार, जयंत पाटील, जयप्रकाश दांडेगावकर यांच्यासोबत चर्चा झाली असून पुढेही करु. ऊसतोड कामगारांच्या घामाची जाण आहे. त्यांना लाचारी नको, स्वाभीमान म्हणून आपण ऊसतोडणीस जा म्हणून सांगीतले. लोक बैठकीनंतर बघू म्हणतात. तुमचा आकडा सांगा, पक्षाचे पत्रक काढून, दौरा करुन काय झाले, असा सवालही त्यांनी पक्षविरोधकांना केला. ऊसतोड कामगारांच्या प्रश्नावर काम करणाऱ्यांना युपीत पाठवू असा टोला लगावतांनाच तुमच्या २७ तारखेच्या बैठकीनंतर मी काय ते ठरवेल, असा इशारा दिला.

माझ्या पराभवामुळे लोक आणि कार्यकर्त्यांची पराभवाची मोठी भावना आहे. मात्र, पराभव दिवंगत मुंडे साहेब जाण्याइतका तर वाईट नाही ना, आपला पराभव करता येत नसल्याने आपल्यात विसंवाद घडवून पराभवाचे प्रयत्न केले जात असल्याचे सांगत वज्रमुठ आवळा, मागे वळून पाहणार नाही, अशी शपथ घ्या, असे आवाहन पंकजा मुंडे यांनी केले. 

मला राष्ट्रीय सचिवपद दिले असले तरी ही एक संधी आहे. मात्र, मी बीडची भुमिपुत्र असून हीच माझी कर्मभूमी आहे. मी महाराष्ट्रात लक्ष घालणार आहे. पुर्वी निधीचा पाऊस पाडला आता रस्त्यावर उतरुन जाब विचारु असे म्हणत सरकारच्या चांगल्या कामाचे कौतुक करण्याची दानत असल्याचेही पंकजा मुंडे यांनी नमूद केले.

Edited By : Jagdish Pansare

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख