पंढरपूर : विधानसभा निवडणुकीसाठी आणखी वर्षभराचा अवधी असला तरी सर्वच पक्षांमध्ये उमेदवारांची चाचपणी सुरु झाली आहे. भाजपचे ज्येष्ठ नेते महसूल मंत्री चंद्रकांत पाटील यांनी आज दक्षिण कराड मधून विठ्ठल मंदिर समितीचे अध्यक्ष डाॅ. अतुल भोसले हे भाजपचे उमेदवार असतील, अशी पंढरपुरात घोषणा करुन विधानसभा निवडणूकींचे रणशिंग फुंकले.
विठ्ठल रुक्मिणी मंदिर समितीच्या वतीने सुमारे 80 कोटी रुपये खर्च करुन बांधण्यात आलेल्या भक्तनिवासाचा आज मुख्यमंत्री देवेंद्र फडणवीस यांच्या हस्ते व चंद्रकांत पाटील यांच्या प्रमुख उपस्थितीमध्ये लोकार्पण सोहळा पार पडला.
यावेळी बोलताना पाटील यांनी डाॅ.अतुल भोसले यांंच्या कामाचे कौतुक करुन त्यांनी कराड दक्षिण मधून निवडणूकीसाठी तयारी सुरु करावी असे जाहीर भाषणामध्ये सांगितले.
``डाॅ. भोसले यांना साखर कारखाना, हाॅस्पिटलसह अनेक सहकारी संस्था चालवण्याचा चांगला अनुभव आहे. त्यामुळेच मुख्यमंत्र्यांनी त्यांच्यावर राज्यातील महत्वाच्या आणि मोठ्या असलेल्या विठ्ठल मंदिर समितीची धुरा सोपवली आहे. सुरवातीला त्यांना बराच विरोध सहन करावा लागला. मात्र त्यांनी आपल्या कामातून वारकऱ्यांचा विश्वास संपादन केला आहे. त्यांचे काम पाहून त्यांना आणखी मोठी जबाबदारी देण्याचा विचार मुख्यमंत्रीसाहेब करत आहेत. यासाठी त्यांना प्रथम आमदार व्हावे लागेल. आगामी निवडणूकीसाठी त्यांना दक्षिण कराड मधून माजी मुख्यमंत्र्यांशी लढावे लागणार आहे. तेव्हा त्यांनी मतदारसंघातही आता पासूनच चांगले लक्ष घालावे, त्यांना कोणतीही मदत लागली तर आम्ही ती देऊ,`` अशा शब्दांत चंद्रकांतदादांनी भोसले यांचे कौतुक केले.
मंत्री पाटील यांनीच मुख्यमंत्री फडणवीस यांच्या समोर जाहीर सभेत अतुल भोसले यांची दक्षिण कराड मधून उमेदवारी जाहीर केल्यानंतर मुख्यमंत्र्यांसह कराड येथून आलेल्या कार्यकर्त्यांनीही टाळया वाजवून स्वागत केले. डाॅ. अतुल भोसले यांच्या रुपाने आज भाजपने आपल्या पहिल्या उमेदवाराच्या नावाची घोषणा करुन निवडणुकींचे रणशिंग फुंकले आहे.
यावेळी सहकारमंत्री सुभाष देशमुख, आमदार भारत भालके, आमदार प्रशांत परिचारक, मंदिर समितीचे सहअध्यक्ष गहिनीनाथ आैसेकर महाराज, सदस्या अॅड. माधवी निगडे, संभाजी शिंदे, माजी आमदार सुधाकर परिचारक, खासदार विजयसिंह मोहिते पाटील आदी उपस्थित होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.