शेलारांची शिवसेनेसाठी कविता : `छे..छे.. झुकली रे झुकली....'

पुणे - कॉंग्रेसचे नेते राहुल गांधी यांनी स्वातंत्र्यवीर सावरकर यांच्याबाबत केलेल्या वक्तव्यावरून शिवसेना आणि भाजपमध्ये चांगलेच वाक् युद्ध रंगले आहे. भाजपचे नेते अॅड. आशिष शेलार यांनी आज सकाळी शिवसेनेला आणि खासदार संजय राऊत यांच्या लेखणीला डिवचत चक्क मुक्त छंदातील कविताच सादर केली आहे.

अॅड. आशिष शेलार यांनी केलेली कविता जशीच्या तशी : 

नाही धार "सच्चाई"कारांच्या शब्दांना आज दिसली
"रोखठोक" लेखणी त्यांच्याकडेच पाहुन म्हणे हसली
सत्ता पहा कशी आज सावरकरांच्या अपमानापेक्षा मोठी ठरली
नागू सयाजी वाडीतून का नाही महाराष्ट्र धर्माची उजळणी झाली?
छे..छे..झुकली रे झुकली
मराठी बाणा सांगणारी सेना
सत्तेसाठी काँग्रेस समोर झुकली!

विरोधी पक्षनेते देवेंद्र फडणवीस यांनी शिवसेनेने घेतलेल्या मवाळ भूमिकेवर काल टीका केली होती. फडणवीस यांच्यासह इतर नेत्यांनीही सडकून टीका केली होती. त्यामुळे शिवसेना विरुद्ध भाजप असे वाक् युद्ध रंगले आहे. शेलार यांनी थेट राऊत यांच्या लेखणीवरच आज प्रहार करीत शिवसेनेच्या भूमिकेवर कविता ट्विट करीत टीका केली आहे.