विधानपरिषदेत सुनील तटकरे - अनिकेत तटकरे ही पिता-पुत्राची जोडी एकत्र आली

मुंबई  : रायगड-रत्नागिरी-सिंधुदुर्ग स्थानिक प्रधिकारी संस्था मतदारसंघातून विधानपरिषदेवर निवडून गेलेले नवनिर्वाचित सदस्य अनिकेत तटकरे यांनी शनिवारी विधानपरिषद सदस्यत्वाची शपथ घेतली. विधानपरिषदेचे सभापती रामराजे नाईक-निंबाळकर यांनी त्यांना शपथ दिली.

विधिमंडळाच्या मध्यवर्ती सभागृहात पार पडलेल्या या कार्यक्रमाला विधानमंडळाचे प्रधान सचिव डॉ. अनंत कळसे, माजी मंत्री सुनील तटकरे, शेतकरी कामगार पक्षाचे आमदार जयंत पाटील, आमदार हेमंत टकले, विद्या चव्हाण, माजी मंत्री नवाब मलिक तसेच मुंबई, रायगड जिल्ह्यातील राष्ट्रवादी काँग्रेसचे कार्यकर्ते मोठ्या संख्येने उपस्थित होते.

राष्ट्रवादीचे अनिकेत तटकरे हे शिवसेनेचे उमेदवार राजीव साबळे यांचा पराभव करून विधानपरिषदेवर निवडून आले आहेत. त्यामुळे विधानपरिषदेत आता सुनील तटकरे आणि अनिकेत तटकरे ही पिता-पुत्राची जोडी एकत्र काम करताना दिसेल.