सरकार स्थापण्याच्या फेल गनिमी काव्याचे नायक अजित पवार : फडणवीस 

पुणे : सत्ता स्थापनेच्या नाट्यात आमचा सर्वाधिक अपेक्षाभंग उद्धव ठाकरे यांच्याकडून झाल्याची भावना माजी मुख्यमंत्री देवेंद्र फडणवीस यांनी व्यक्त केली. 

कॉंग्रेसबरोबर जात शिवसेनेने बाळासाहेब ठाकरे यांचे विचार गुंडाळून ठेवले, अशी टीका फडणवीस यांनी केली. विशिष्ट परिस्थितीत अजित पवार यांच्यासोबत सरकार स्थापन केले. या फेल गनिमी काव्याचे नायक अजित पवार होते, असे फडणवीस यांनी सांगितले. 

एका वृत्त वाहिनीशी बोलताना त्यांनी राज्यातील ठाकरे सरकार तसेच भाजपात सध्या सुरू असलेल्या आरोप-प्रत्यारोप व नाराजीनाट्यावर सविस्तर उत्तरे दिली. 
शिवसेना आमच्याबरोबर राहील असे आम्हाला शेवटपर्यंत वाटत होते. मात्र, विचाराला तिलांजली देत शिवसेनेने कॉंग्रेसबरोबर जवळीक केली.

अजित पवार स्वत:हून आमच्याकडे आले. आमदारांचा पाठिंब्याचे पत्र त्यांनी दिले. शरद पवार यांच्याशी बोलल्याचे त्यांनी सांगितले. त्यामुळे आम्ही सरकार स्थापन केले. 
अडीच वर्षाच्या मुख्यमंत्रीपदाबाबत माझ्यासमोर कधीच बोलणे झाले नव्हते, असे त्यांनी सांगितले. पंकजा मुंडे या पक्षातील माझ्या केवळ सहकारी नव्हे तर बहिणीसारख्या आहेत. गेल्या पाच वर्षात ज्या-ज्यावेळी त्यांच्यावर आरोप झाले त्या-त्यावेळी त्यांच्या पाठीशी उभा राहिलो.

पाच वर्षे त्यांच्याकडे ग्रामविकास व महिला व बालकल्याण विभागासारखी महत्वाची खाती होती. ज्येष्ठ नेते एकनाथ खडसे यांच्याबाबत विचारले असता, ते म्हणाले, ""मनातील खद्‌खद असले तर योग्य ठिकाणी मांडता आली असती, ज्या प्रकारे ते बोलले ते टाळले असते तर बरे झाले असते.'' 

ज्येष्ठ नेते शरद पवार अडून-अडून माझ्या जातीचा उल्लेख वारंवार करत असल्याने गेल्या पाच वर्षात मी राज्यातला मोठा नेता झाल्यासारखे वाटत आहे. मात्र, स्वत:ला पुरोगामी म्हणवणाऱ्या पवार यांनी वारंवार जातीचा उल्लेख अडून-अडून केला. राजकारण काहीही असले तरी पवार ज्येष्ठ नेते आहेत. राजकीय मतभेद असतील. मात्र, शत्रूत्व कुणाशीच नाही, असे फडणवीस यांनी स्पष्ट केले.