अजित पवारांच्या राजीनाम्याच्या घटनेने बारामतीमध्ये अस्वस्थता

बारामती : राज्याचे माजी उपमुख्यमंत्री अजित पवार यांनी राजीनामा दिल्यानंतर बारामतीकरांमध्ये कमालीची अस्वस्थता आहे. अजित पवार यांनी नेमका कशामुळे राजीनामा दिला याची कोणालाच माहिती नसल्यामुळे आणि अजित पवार आहेत कुठे आहेत याचीही कोणाला माहिती नसल्यामुळे राष्ट्रवादी कॉंग्रेसच्या पदाधिकाऱ्यांसह बारामतीकरांमध्ये सध्या चर्चेचा हाच विषय आहे. 

अनेक आमदार, खासदारांनीदेखील बारामतीमधील प्रमुख पदाधिकाऱ्यांना फोन करून अजित पवार यांच्या राजीनाम्यामागची पार्श्वभूमी जाणून घेण्याचा प्रयत्न केला. अजित पवार यांनी कोणालाही या राजीनाम्याची कल्पना दिली नव्हती हे आता समोर येत आहे. अजित पवार यांचे निकटवर्तीय व अजित पवार यांच्या निवडणुकीच्या कामकाजाची जबाबदारी ज्यांच्यावर असते असे ज्येष्ठ नगरसेवक किरण गुजर यांनी देखील फेसबुक वर एक पोस्ट टाकून अजित पवार यांनी आता निर्णय जनतेवर सोपवावा, अजित पवार हे बारामतीकरांचे आहेत, त्यांनी इतक्‍या वर्ष समाजकारणात बारामतीकरांसाठी काम केलेले असल्यामुळे आता अजित पवारांनी काय करायचे हे बारामतीकरांना ठरवू द्या , असे प्रेमाचे आवाहन केले आहे. 

दादा...तुम्ही अत्यंत भावनाशील आहात आपल्यामुळे कोणीही दुखावले जाऊ नये याची काळजी घेत असताना, तुम्ही सगळ्यांचीच मने जपली ....बऱ्याच वेळा मनाला मुरड घालून जवळच्यानाही गप्प बसवून बाजूला ठेवून बाकीच्यांची मने सांभाळलीत.... तुम्ही कायमच साहेबांचा आदर करीत आला आहात, काही झाले तरी साहेबाना दुखावले जाणार नाही, या साठी मला कोणतीही किंमत मोजावी लागली तरी चालेल या बाबत तुम्ही कायमच ठाम आहात. सार्वजनिक जीवनातून तुम्ही बाजूला जाऊ शकत नाही, काही व्यक्ती या समाजासाठी असतात, नव्हे त्यांचा जन्मच लोकसेवेसाठी असतो हा इतिहास आहे, त्यामुळे तुम्ही आता तुमच्या पुरते नाहीत, तर सर्व समाजाचे बारामतीकरांचे आहात तुम्ही तालुक्‍यावर निस्सिम प्रेम करता आहात, त्या मुळे आता तालुक्‍यातील जनतेला ठरवू द्या समाजाला ठरवू दया की दादांनी काय करायचे ते. तो आता आमचा हक्क ,अधिकार आहे.