नगर : कोरोनाबाधित रुग्ण आढळल्याने मुकुंदनगर परिसर प्रशासनाने 'हॉट स्पॉट' जाहीर केला. परिणामी, येथील अत्यावश्‍यक सेवाही पूर्णपणे बंद आहेत. अशात आजारी आईच्या औषधांसाठी मुलाने थेट जिल्हाधिकारी राहुल द्विवेदी यांनाच ट्विटरवरून साद घातली. त्यांनीही याला प्रतिसाद देत अवघ्या तासाभरात आवश्‍यक औषधे मुकुंदनगरमधील संबंधित मुलाच्या घरी पोच केली. जिल्हाधिकांऱ्यामधील दक्ष अधिकाऱ्यासह एका संवेदनशील माणसाचेही या निमित्ताने नगरकरांना दर्शन झाले.
कोरोनाच्या पार्श्‍वभूमीवर मुकुंदनगर परिसर 'हॉट स्पॉट' जाहीर केला आहे. येथील अत्यावश्‍यक सेवाही बंद आहेत. दैनंदिन गरजांची पूर्तता करण्याची जबाबदारी महापालिकेकडे दिली आहे. महापालिकेने अत्यावश्‍यक वस्तूंची मागणी नोंदविण्यासाठी हेल्पलाइन क्रमांक दिले आहेत. या हेल्पलाइन क्रमांकावर औषधांसाठी मुकुंदनगर येथील एक जण रविवारी (ता. 12) सायंकाळी संपर्क करीत होते. जवळपास दोन तास प्रयत्न करूनही क्रमांक बिझी येत होता.
अखेर संबंधित नागरिकाने रविवारी रात्री आठ वाजता आपल्या अडचणीबाबत ट्विट केले. द्विवेदी यांनी तातडीने त्याची दखल घेत त्वरित प्रिस्क्रिप्शन मागविले. त्यानंतर संबंधित औषधे प्रशासकीय यंत्रणेमार्फत नागरिकाच्या घरी पोचविली. जिल्हाधिकाऱ्यांच्या माध्यमातून थेट घरपोच आलेली आवश्‍यक औषधे पाहून संबंधित परिवार अवाक्‌ झाला. जिल्हाधिकाऱ्यांच्या या तत्परतेबद्दल या परिवाराने प्रशासन व प्रशासनप्रमुखांप्रती आभार व्यक्त केले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.