सत्ता स्थापनेच्या हालचाली गतीमान, आदित्यंचा कोकण दौरा रद्द 

मुंबई : शिवसेना आमदारांची तातडीने बैठक बोलविण्यात आल्याने पक्षाचे युवानेते आदित्य ठाकरे यांनी आपला कोकण दौरा पुढे ढकलला आहे. 

विधानसभा निकालानंतर सत्ता स्थापनेसाठी हालचाली गतीमान झाल्या असून भाजप विधिमंडळ नेतेपदी पुन्हा देवेंद्र फडणवीस यांची निवड झाली आहे. त्यामुळे फडणवीस दुसऱ्यांदा मुख्यमंत्री होत आहे. भाजपने नगरविकास, गृह, विधानसभा अध्यक्षपद सोडण्याची तयारी दाखविलेली नाही. ही महत्त्वाची खाती या पक्षाकडेच राहणार असल्याचे दिसून येत आहे. महायुतीत शिवसेना असल्यानी सत्तेत सहभागी होणार आहे. 

शिवसेना आमदारांचा आकडा कमी झाला असला तरी सत्तेतील भागीदारी वाढण्याची शक्‍यता आहे. भाजपला शिवसेनेला बरोबर घेऊनच सरकार स्थापन करावे लागणार आहे. शिवसेनेने अद्याप आपला पत्ता उघडला नाही. त्यामुळे या पक्षाच्या भूमिकेकडे सर्वांचे लक्ष लागून राहिलेले आहे.

त्याचाच एक भाग म्हणून शिवसेनेनेही आमदारांची तातडीची बैठक बोलविली आहे. यावेळी शिवसेना महत्त्वाचा निर्णय घेणार आहे. या बैठकीसाठी थांबणे गरजेचे असल्याचे आदित्य यांनी आपला कोकण दौरा पुढे ढकलला आहे.