पालघर लोकसभा मतदारसंघ : युतीतली धुसफूस बहुजन विकास आघाडीच्या पथ्यावर पडणार?

पालघर : हा मतदारसंघ 2009 मध्ये अस्तित्वात आला. पहिल्याच निवडणुकीत "बविआ'चे बळीराम जाधव निवडून आले; मात्र 2014 मध्ये "मोदी लाट'मुळे भाजपचे चिंतामण वनगा यांनी जाधव यांचा पराभव केला. परंतु, त्यानंतर झालेल्या विधानसभा निवडणुकीत पालघरमधील सहांपैकी तीन जागा जिंकून आपले वर्चस्व बविआने दाखवून दिले होते. वसई-विरार महापालिकेतही बविआने भाजपला धूळ चारली होती. तेथे भाजपला केवळ एकच जागा जिंकता आली. चिंतामण वनगा यांच्या निधनानंतर झालेल्या पोटनिवडणुकीत शिवसेना-भाजपमध्ये कलगीतुरा रंगला होता. शिवसेनेने वनगा यांचे पुत्र श्रीनिवास वनगा यांना उमेदवारी देत भाजपला शह देण्याचा प्रयत्न केला; मात्र भाजपने कॉंग्रेसचे राजेंद्र गावित यांना रिंगणात उतरवत पालघरवर वर्चस्व कायम राखण्यात यश मिळवले. अवघ्या आठ महिन्यांसाठी खासदारकी मिळालेल्या गावित यांनी केलेली कामे मतदारांवर कितपत प्रभाव टाकू शकतील, हे मतदानानंतरच स्पष्ट होईल.

बविआची साथ मिळवण्यासाठी सर्वच पक्ष इच्छुक आहेत; मात्र बविआचे सर्वेसर्वा हितेंद्र ठाकूर यांनी अद्याप भूमिका स्पष्ट केलेली नाही. या मतदारसंघात मार्क्‍सवादी कम्युनिस्ट पक्षाचीही (सीपीएम) डहाणू, तलासरी आणि इतर भागांत बऱ्यापैकी ताकद आहे. ते कोणत्या मोठ्या पक्षाला साथ देतात हे पाहणेही औत्सुक्‍याचे ठरणार आहे. मतदारसंघातील राजकीय समीकरणे अधूनमधून बदलत आहेत. असे असले तरी 2014 प्रमाणेच वर्चस्व मिळवण्यासाठी शिवसेना-भाजपमध्ये पुन्हा संघर्ष दिसण्याची चिन्हे आहेत.

2014 चे मतविभाजन
भाजप : चिंतामण वनगा - 5,33,201
बविआ : बळीराम जाधव - 2,93,681
सीपीएम : रूपा खरपडे - 78,890
आप : पांडुरंग पारधी - 16,182

पक्षनिहाय इच्छुक उमेदवार
भाजप : राजेंद्र गावित
शिवसेना : श्रीनिवास वनगा
कॉंग्रेस : दामू शिंगडा, सचिन शिंगडा
बविआ : बळीराम जाधव

मतदारांतील नाराजीची कारणे
- लोकल सेवेचा प्रश्‍न, लांब पल्ल्याच्या गाड्यांना थांबा, डहाणू-नाशिक रेल्वेचा रखडलेला प्रश्‍न
- कारखान्यांची परिस्थिती बिकट. राज्याच्या सीमेवरील अनेक लोक रोजगारासाठी गुजरातच्या दिशेने
- 'ओएनजीसी'च्या सर्वेक्षणामुळे मच्छीमारांची उपासमार. डिझेलचा परतावा नाही. "सीआरझेड'च्या कात्रीत घरांचा प्रश्‍न रखडला
- आदिवासींच्या विकासाची घोषणा कागदावरच
- विविध प्रकल्पांसाठी जागा जात असल्याने भूमिपुत्रांमध्ये असंतोष