नाशिक : राज्य आणि केंद्रातील भारतीय जनता पक्ष-शिवसेना युती सत्ताधाऱ्यांनी दिलेल्या आश्वासनांची पूर्तता न झाल्याने युवकांमध्ये नैराश्याचे वातावरण आहे. या नैराश्यातून बाहेर काढून युवकांना आश्वासक बनवत त्यांना कॉंग्रेसच्या विचारधारेशी जोडण्यात येईल, असे युवक कॉंग्रेसचे नवनिर्वाचित प्रदेशाध्यक्ष सत्यजीत तांबे यांनी सांगितले.
नागपूरमध्ये संघटनात्मक निवडणुकीचा निकाल जाहीर झाल्यानंतर ते बोलत होते .
सत्यजीत तांबे गेल्या पंधरा वर्षांपासून एन. एस. यु. आय., युवक कॉंग्रेसच्या माध्यमातून सक्रीय आहेत. आमदार विश्वजीत कदम यांच्या प्रदेशाध्यक्षपदाच्या कालावधीत त्यांनी प्रदेश उपाध्यक्ष म्हणून काम पाहिले. माजीमंत्री बाळासाहेब थोरात यांचे ते भाचे आहेत . आमदार डॉ. सुधीर तांबे व संगमनेरच्या नगराध्यक्षा दुर्गा तांबे यांचे ते चिरंजीव आहेत .
सत्यजीत यांनी दोनवेळी नगर जिल्हा परिषदेचे सदस्य म्हणून काम पाहिले. मागील विधानसभा निवडणुकीत त्यांनी नगर शहर मतदारसंघातून कॉंग्रेसचे उमेदवार म्हणून निवडणूक लढवली होती. कॉंग्रेस अध्यक्ष राहूल गांधी यांच्याशी थेट संपर्क त्यांचा राहिला आहे. संघटनात्मक कामकाजातून त्यांनी राज्यभर मित्र जोडले आहेत. त्यामुळे नागपूरमध्ये निकाल जाहीर झाला असला, तरीही सत्यजीत हे संगमनेरमध्ये असतानाही त्यांच्यावर राज्यभरातून अभिनंदनाचा वर्षाव झाला.
नागरी विकास, अंतरराष्ट्रीय राजकारण आणि युवक सशक्तीकरण या विषयावर विशेष अभ्यास असल्याने सत्यजीत यांच्याकडून युवक कॉंग्रेसच्या बळकटीकरणाविषयीच्या नेत्यांच्या अपेक्षा उंचावल्या आहेत.
निवडीबद्दल प्रतिक्रिया व्यक्त करताना सत्यजीत म्हणाले, की ज्येष्ठांचा आशिर्वाद आणि युवकांचा विश्वास यातून प्रदेशाध्यक्षपदाची संधी मिळाली आहे. आगामी निवडणुकांच्या तोंडावर संघटनात्मकदृष्ट्या मोठी जबाबदारी मिळाली असल्याने युवकांना एकसंघ ठेवण्याचा प्रयत्न केला जाईल. गट-तटाशिवाय युवक पक्षाशी जोडले जावे यावर भर राहील. आमदार विश्वजीत कदम यांनी संघटनात्मक मोठे काम उभे केले आहे. हे काम पुढे नेले जाईल.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.