रामराजे, लक्षात ठेवा माझ्यासारखा वाईट कोणी नाही : उदयनराजे 

सातारा : मी कुणाच्या आधारावर नाही. स्वतःच्या हिमतीवर आहे. मी कॉलर उडवतो, यापुढेही उडवत राहणार. तुमच्या वयाचा विचार करून गप्प बसतोय. माझ्यासारखा कोणी वाईट नाही. माझ्या कॉलरवर बोलायचे असेल तर समोर येऊन बोला, असा इशारा खासदार उदयनराजे भोसले यांनी रामराजे नाईक -निंबाळकर यांचे नाव न घेता दिला. 

उदयनराजे म्हणाले, मी केलेली नौटंकी दिसते. लावणी म्हणतो, या पुढेही हे करतच राहणार. मी नेहमीच खरे बोलतो, खोटे बोलत नाही. माझ्या वागण्यात बदल होणार नाही. मी तत्व सोडून बोलत नाही. माझ्या स्वभावात बदल करू शकत नाही. मैंने एक बार कमिटमेंट कर दी तो मै खुद की बी नही सूनता....असाही टोला त्यांनी लगावला. 

सातारा राजधानी महोत्सव या कार्यक्रमातून जिल्हातील विविध क्षेत्रातील मुलांना वाव मिळाला पाहिजे. त्यांचा उत्कर्ष झाला पाहिजे हा या मागचा उद्देश आहे. याला कोणी राजकीय स्वरूप देऊ नये. अजूनही असा कोणीही प्रयत्न केला नाही. मुलाच्या भवितव्यासाठी काम करत राहणार आहे, असे ते म्हणाले.