मुख्यमंत्र्यांनी पुन्हा सुभाष देसाईंचा 'आवाज' दाबला! 

मुख्यमंत्र्यांनी पुन्हा सुभाष देसाईंचा 'आवाज' दाबला! 

नागपूर : मुख्यमंत्री देवेंद्र फडणवीस यांनी उद्योग मंत्री सुभाष देसाई यांना पुन्हा "नाणार' प्रकल्पावर बोलू दिले नाही. पावसाळी अधिवेशनाच्या पूर्वसंध्येला पत्रकार परिषदेत मुख्यमंत्र्यांनी उद्योगमंत्री सुभाष देसाईंना नाणारवर बोलू दिले नव्हते. त्याचीच पुनरावृत्ती आज विधान परिषदेत झाली. 

"नाणार' प्रकल्पावर शिवसेनेच्या सदस्यांनी लक्षवेधी सूचना मांडली होती. या लक्षवेधीवर उद्योगमंत्री सुभाष देसाई यांनी उत्तर देणे अपेक्षित होते. ही लक्षवेधी सूचना लागल्यानंतर या लक्षवेधीवर आपणच उत्तर देणार असल्याची लेखी सूचना मुख्यमंत्री देवेंद्र फडणवीस यांनी पीठासीन अधिकाऱ्यांकडे पाठविली होती. यावेळी पीठासीन अधिकारी उपसभापती माणिकराव ठाकरे होते. नाणारवरील लक्षवेधी सूचना पुकारण्यात आल्यानंतरही मुख्यमंत्री सभागृहात आले नव्हते. माणिकराव ठाकरे यांनी या लक्षवेधीवरील चर्चेला सुरूवात केली. मुख्यमंत्री नसल्याने भाजपच्या सदस्यांनी गोंधळ घालून देसाईंना बोलू दिले नाही.

मुख्यमंत्री या लक्षवेधीवर उत्तर देणार असल्याने ही लक्षवेधी सूचना राखून ठेवावी, अशी मागणी भाजपचे सदस्य करू लागले. परंतु पुकारलेली लक्षवेधी राखून ठेवता येत नाही. समाधानकारक उत्तर नसले तरच लक्षवेधी सूचना राखून ठेवता येते, असे ठाकरे यांनी सदस्यांना सांगितले. यावरून भाजप व सेना सदस्यांमध्ये शाब्दीक चकमक सुरू झाली. ही चकमक सुरु असताना मुख्यमंत्र्यांचे सभागृहात आगमन झाले. या लक्षवेधी सूचनेवर मुख्यमंत्र्यांनी सदस्यांच्या प्रश्‍नांना उत्तरे दिली. 

उद्योगमंत्री असतानाही शिवसेनेचे सुभाष देसाई यांना मात्र मुख्यमंत्र्यांनी दुसऱ्यांदा बोलू दिले नाही. यापूर्वी पावसाळी अधिवेशनाच्या पूर्वसंध्येला सत्ताधारी पक्षाच्या नेत्यांची बैठक झाल्यानंतर पत्रकार परिषदेत नाणार प्रकल्पावर प्रश्‍न विचारल्यानंतर ही माझी पत्रकार परिषद आहे. त्यामुळे मीच यावर बोलणार आहे. या प्रश्‍नावर सुभाष देसाईंशी बोलायचे असेल तर आपण वेगळे बोला, असे मुख्यमंत्र्यांनी पत्रकारांना सुचविले होते. 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com