नगर : श्रीगोंदा मतदारसंघातील राष्ट्रवादी कॉंग्रेसचे आमदार राहुल जगताप यांचे कार्यकर्ते व माजी आमदार बबनराव पाचपुते यांच्या कार्यकर्त्यांत शनिवारी पुन्हा राडा झाला. दोन्ही गटांत हाणामारी झाल्याने एकमेकांविरुद्ध गुन्हे दाखल झाले आहेत.
या मारामारीची फिर्याद भाजपचे गणेश चांदगुडे यांनी दिली. रस्त्याने जात असताना युवक राष्ट्रवादी कॉंग्रेसचे अध्यक्ष ऍड. ऋषिकेश गायकवाड, मंगेश सूर्यवंशी, अक्षय काळे, मंगेश मोटे आदींनी चांदगुडे यांना अडवून मारहाण केल्याचे फिर्यादित म्हटले आहे. दुसरी फिर्याद ऍड. ऋषिकेश गायकवाड यांनी दिली. या फिर्यादीनुसार नगरसेवक सुनील वाळके याने गायकवाड यांना अडवून मारहाण केली. तसेच "बबनराव पाचपुते यांना विरोध करतो. तुझा 30 जूनला वाढदिवस कसा साजरा होतो तेच बघतो,' असे म्हणत तलवारीने वार करण्याचा प्रयत्न केल्याचे फिर्यादित म्हटले आहे. पोलिसांनी परस्पर गुन्हे दाखल करून घेत ऍड. ऋषिकेश गायकवाड व गणेश चांदगुडे यांना अटक केली.
श्रीगोंद्यात पाचपुते विरुद्ध जगताप या दोन्ही गटांमध्ये विस्तव जात नाही, अशी स्थिती आहे. मागील विधानसभा निवडणुकीत भाजपची मोठी कुमक, राष्ट्रीय पातळीचे नेते आणूनही माजी मंत्री बबनराव पाचपुते यांना विजय खेचून आणता आली नाही. या उलट कुकडी सहकारी साखर कारखान्याच्या एकमेव सत्तेच्या जोरावर व जनसंपर्कावर ज्येष्ठ नेते कुंडलिकराव जगताप यांचे चिरंजीव राहुल जगताप यांनी विधानसभेची निवडणूक जिंकून पाचपुते यांना मोठा हादरा दिला. अनेक वर्षे सत्ता उपभोगलेल्या पाचपुते यांना हा पराभव पचणारा नव्हता. त्यामुळे दोन्ही गटांमध्ये वारंवार वाद होत आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.