आशा बुचके यांची शिवसेनेतून हकालपट्टी

पुणे : लोकसभा निवडणुकीत पक्षाच्या विरोधात काम करणाऱ्या नेत्यांविरोधात शिवसेनेने कारवाई सुरू केली असून त्यानुसार पुणे जिल्हा परिषदेच्या सदस्या आणि जुन्नरमधील पक्षाच्या नेत्या आशा बुचके यांची हकालपट्टी करण्यात आली आहे. शिवसेनेचे पुणे जिल्हाप्रमुख (शिरूर लोकसभा) राम गावडे यांनाही पदावरून दूर करण्यात आले आहे. त्यांच्या जागी जिल्हा परिषद सदस्य माऊली कटके यांची नियुक्ती करण्यात आली आहे.

या दोन्ही निर्णय़ामुळे शिवसेनेत खळबळ उडाली आहे. माजी खासदार शिवाजीराव आढळराव पाटील यांचा या निवडणुकीत पराभव झाला होता. तो पक्षाच्या जिव्हारी लागला आहे. आढळराव यांची पक्षाच्या उपनेतेपदी नियुक्ती झाल्यानंतर कारवाई सुरू झाली आहे. पुणे शहरातील दोन प्रमुख माजी आमदार चंद्रकांत मोकाटे आणि महादेव बाबर यांनाही दोन दिवसांपूर्वी पदावरून दूर करण्यात आले होेते.

बुचके या 2002 पासून जिल्हा परिषदेच्या सदस्या आहेत. त्यांनी 2009 आणि 2014 मध्ये पक्षाकडून विधानसभेची निवडणूक लढविली होती. 2014 च्या निवडणुकीत मनसेकडून निवडून आलेले आमदार शरद सोनवणे यांनी लोकसभा निवडणुकीच्या काही दिवस आधी शिवसेनेत प्रवेश केला होता. त्या प्रवेशाला बुचके यांनी विरोध केला होता.

उद्धव ठाकरे यांच्या मातोश्री निवासस्थानी बुचके समर्थकांनी गोंधळ घालण्याचा प्रयत्न केला होता. त्यावरून त्यांना सुनावण्यात आले होते. लोकसभा निवडणुकीच्या प्रचारात बुचके यांनी पक्षाच्या विरोधात काम केल्याचा ठपका ठेवून त्यांना अखेर पक्षाबाहेर काढण्यात आले. या गटबाजीचा जुन्नरमधून पक्षाला सर्वाधिक फटका बसला. येथे राष्ट्रवादीचे उमेदवार अमोल कोल्हे यांना 46 हजाराचे मताधिक्य मिळाले.  बुचके यांच्या हकालपट्टीने शरद सोनवणे यांनी जुन्नरची उमेदवारी निश्चित झाल्याचे मानण्यात येत आहे. 

पक्षाने शिरूर लोकसभा मतदारसंघात तालुकाप्रमुख नेमले आहेत. त्यांचीही घोषणा करण्यात आली. त्यात माऊली खंडागळे (जुन्नर), अरुण गिरे (आंबेगाव), रामदास धनवटे (खेड-आळंदी), गणेश जामदार (शिरूर, 39 गावे)