लोकसभा निवडणुकीत भाजप, स्वाभिमानी आणि वंचित असा तिरंगी सामना झाला. वसंतदादा पाटील घराणे प्रथमच कॉंग्रेसच्या चिन्हाशिवाय दुसऱ्या पक्षाकडून लढले. तरुण उमेदवार विशाल पाटील यांनी भाजपच्या संजय पाटलांसमोर कडवे आव्हान उभे करत मरगळलेल्या कॉंग्रेसमध्ये जाण आणली. कॉंग्रेसचा भविष्यात जिल्ह्याचा नेता कोण हेदेखील ही निवडणूक ठरवेल. त्याचबरोबर वंचित आघाडीचा फॅक्‍टरही जिल्ह्यात नव्याने गोपीचंद पडळकरांमुळे पुढे आला. या सर्वांचे परिणाम विधानसभा निवडणुकीत नक्की दिसतील. मतदारसंघातील सहापैकी तीन मतदारसंघात भाजप, तर उर्वरित तीनमध्ये शिवसेना, कॉंग्रेस आणि राष्ट्रवादीचे आमदार आहेत. वंचित आघाडीही काही ठिकाणी आव्हान उभे करू शकते.
सांगली विधानसभा मतदारसंघात गेल्या वेळी सुधीर गाडगीळ जायंट किलर ठरले. या वेळी कॉंग्रेसकडून कोणाला मैदानात उतरावयाचे याबाबत अद्याप निश्‍चित धोरण नाही. जयश्रीताई पाटील या कॉंग्रेसकडून प्रमुख दावेदार ठरू शकतील. इतरही दावेदार पुढे येणे शक्‍य आहे.
राखीव मिरज मतदारसंघात भाजपचे सुरेश खाडे यांच्यासमोर कोण हे स्पष्ट नाही. कॉंग्रेस-राष्ट्रवादी आणि वंचित बहुजन आघाडी मैदानात उतरणे शक्‍य आहे. तासगाव-कवठेमहांकाळ मतदारसंघात 2014 च्या निवडणुकीत आर. आर. पाटील विजयी झाले. त्यांच्या निधनानंतर त्यांच्या पत्नी सुमन पाटील आमदार झाल्या. तासगावचे भाजप नेते संजय पाटील विद्यमान खासदार आहेत. या मतदारसंघात आर. आर. गट आणि संजय पाटील गट प्रभावी आहे. भाजपचे कवठेमहांकाळचे नेते, माजी मंत्री अजितराव घोरपडे हे भाजपचे उमेदवार असतील. जत तालुक्‍यात भाजपकडून आमदार विलासराव जगताप यांची उमेदवारी निश्‍चित असेल. भाजपमध्ये बंडाचे संकेत आहेत. कॉंग्रेसकडून विक्रम सावंत प्रबळ दावेदार असतील.
पलूस-कडेगाव मतदारसंघ पतंगराव कदम यांचा. पतंगरावांचे प्रचारात नसणे कॉंग्रेसला जिल्ह्यात कमतरता भासवणारे ठरले. त्यांचे पुत्र आमदार विश्‍वजित हेच कॉंग्रेसतर्फे मैदानात असतील, त्यांच्यासमोर भाजपकडून जिल्हा परिषदेचे अध्यक्ष संग्रामसिंह देशमुख यांचे आव्हान असेल. खानापूर विधानसभा मतदारसंघ शिवसेनेकडे आहे. आमदार अनिल बाबर यांनी दुष्काळी भागाला सिंचन योजनांचे बळ देऊन आव्हान कायम ठेवलंय. कॉंग्रेसचे माजी आमदार सदाशिवराव पाटील यांच्याशी त्यांची लढत होईल. येथे वंचित आघाडीचेही आव्हान असेल.
राष्ट्रवादीचे प्रदेशाध्यक्ष जयंत पाटील यांचा फॅक्‍टरही महत्त्वाचा असेल. त्यांचा इस्लामपूर विधानसभा मतदारसंघ हातकणंगले मतदारसंघात येतो. या वेळी त्यांची राजू शेट्टींशी गट्टी जमल्याने बरीच समीकरणे बदललीत. जयंत पाटील यांचा हस्तक्षेप सांगली, मिरज, जत या मतदारसंघांत निकाल बदलू शकतो.
पक्षनिहाय चर्चेतील इच्छुकांची नावे
- भाजप : सुरेश खाडे, विलासराव जगताप, सुधीर गाडगीळ, शिवाजीराव नाईक, अजितराव घोरपडे, राजेंद्रअण्णा देशमुख, निशिकांत पाटील, संग्रामसिंह देशमुख, दिनकर पाटील, डॉ. रवींद्र आरळी, तम्मनगौडा रविपाटील, सम्राट महाडिक.
- कॉंग्रेस ः विश्‍वजित कदम, सदाशिवराव पाटील, जयश्रीताई पाटील, पृथ्वीराज पाटील, सत्यजित देशमुख, विक्रम सावंत, प्रा. सिद्धार्थ जाधव, अॅड. सी. आर. सांगलीकर, आनंदराव डावरे.
- राष्ट्रवादी : जयंत पाटील, सुमनताई पाटील, मानसिंगराव नाईक, अरुण लाड, बाळासाहेब होनमोरे.
- शिवसेना : अनिल बाबर, शेखर माने, संजय विभुते, आनंदराव पवार, दिगंबर जाधव, तानाजीराव सातपुते.
- वंचित आघाडी : ब्रह्मदेव पडळकर, जयसिंग शेंडगे, प्रकाश शेंडगे.
असा आहे राजकीय पट
- आघाडी व युती कायम राहिल्यास जागावाटपावरून मतभेद
- लोकसभेच्या निकालानुसार विधानसभेची गणिते बदलणार
- इच्छुकांचे समाधान करणे सर्वच पक्षांपुढे आव्हान
- वंचित आघाडीचा फॅक्‍टर महत्त्वाचा ठरणार
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.