'अहो आधीचे ' नालायक' बदलले तर हेही झोपच काढताहेत'- पीएनबी घोटाळ्यावर  राज ठाकरेंचे व्यंगचित्र

पुणे :  सुप्रसिद्ध व्यंगचित्रकार  आर के लक्ष्मण यांची आठवण यावी असे व्यंगचित्र मनसे नेते राज ठाकरे यांनी पीएनबी बँकेच्या घोटाळ्यावर काढले आहे . नेहेमीप्रमाणे राज ठाकरे यांनी याही व्यंगचित्रात पंतप्रधान नरेंद्र मोदी यांच्यावर कुंचल्याचे फटकारे ओढले आहेत . 

' बँक ऑफ विश्वास ' असे नाव असलेल्या एका इमारतीतून उद्योजक विजय मल्ल्या , नीरव मोदी बॅगाच्या  बॅगा भरून बाहेर पडत आहेत . काही जण त्यांच्या बरोबर तर काही जण बँकेच्या खिडकीतून बॅगा  घेऊन सुसाट बाहेर पडत आहेत . सुट्सबुटातील एक बँक अधिकारी त्यांना बॅगा दारात डोक्यावर वाहून आणून देत आहे .  बँक कर्मचारी झोपलेला चित्रात दिसतो आहे .

बँकेबाहेर एका बाकड्यावर पहारेकऱ्याच्या   वेशात नरेंद्र मोदी आणि अर्थमंत्री अरुण जेटली डाराडूर झोपलेले दाखवले आहेत . त्यात जेटली तर मोदींच्या खांद्यावर डोके ठेवून झोपलेले दाखवले आहेत . तेथे बँकेच्या ठेवीदार नागरिकाला त्याची पत्नी म्हणते , " अहो ,आधीचे नालायक 'सांगितले ' म्हणून आपण वॉचमन  बदलले ! तर हेही झोपायचं काढत आहेत आणि परिस्थिती पुन्हा तीच !"