पुणे : महापालिका आवारात दादोजी कोंडदेव यांचा फोटो लावण्यावरून ब्राम्हण महासंघ आणि संभाजी ब्रिगेडच्या कार्यकर्त्यात बाचाबाची झाली आहे . ही घटना बुधवारी सकाळी घडली . अखेर ब्राम्हण महासंघाने दादोजी कोंडदेव यांचा फोटो काढून नेला .
आज दादोजी कोंडदेव यांची पुण्यतिथी आहे. त्यानिमित्ताने ब्राम्हण महासंघाच्या कार्यकर्त्यांनी महापालिका आवारात दादोजी कोंडदेव यांचा फोटो लावून पूजन करणार असल्याचे कालच जाहीर केले होते . त्यानुसार ब्राम्हण महासंघाचे आनंद दवे आणि काही कार्यकर्ते महापालिका आवारात सकाळी नऊच्या सुमारास दाखल झाले . त्यांनी महापालिकेच्या आवारात प्रवेश केल्यावर उजव्या हातास असलेल्या एका चौथऱ्यावर खुर्ची टाकून त्यावर दादोजी कोंडदेव यांचा फोटो लावला आणि या फोटोचे पूजन केले .
दरम्यान या घटनेची माहिती मिळताच संभाजी ब्रिगेडचे कार्यकर्ते महापालिका आवारात दाखल झाले . दोन्ही बाजू आमने सामने येताच शाब्दिक चकमक उडून बाचाबाची झाली . प्रविण धुमाळ यांच्या नेतृत्वाखाली संभाजी ब्रिगेडच्या कार्यकर्त्यांनी यावेळी जोरदार घोषणाबाजी करीत दादोजी कोंडदेव यांचा फोटो त्वरित हटविण्याची मागणी केली . थोड्यावेळाने ब्राम्हण महासंघाने दादोजी कोंडदेव यांचा फोटो महापालिकेच्या आवारातून काढून बाहेर नेला . त्यानंतर तणाव निवळला .
संभाजी ब्रिगेडचे प्रविण धुमाळ म्हणाले , " हे दादोजी कोंडदेवाचा फोटो लावणारे काय महापालिकेचे जावई आहेत का ? ते विना परवानगी महापालिका आवारात प्रतिमा पूजन कसे करू शकतात ? हा राष्ट्रीय स्वयंसेवक संघाचा डाव आहे . यांचे गल्ली ते दिल्ली राज्य असल्याने त्यांची हिम्मत वाढली आहे . आमदार मेधा कुलकर्णी आणि महापौर मुक्ता टिळक यांचा या प्रकाराला छुपा पाठिंबा आहे . त्यांनी फोटो काढला नसता तर आम्ही फोटो काढून टाकला असता . "
लाल महालातील दादोजी कोंडदेव यांचा पुतळा हटविल्यानंतर महापालिकेकडून मिळालेले आश्वासन पूर्ण न झाल्याने अखिल भारतीय ब्राह्मण महासंघाकडून महापालिकेच्या आवारात दादोजी कोंडदेव यांच्या प्रतिमेचे पूजन केले ,असा दावा ब्राम्हण महासंघाचे आनंद दवे यांनी केला . ते म्हणाले , " कारण आपले हे शहर सुद्धा इतर राज्याप्रमाणे पुतळे तोडणारे शहर म्हणून कुप्रसिद्ध न राहता येथे पुतळे परत लावणारे सुद्धा आहेत ,हे पण देशाला दाखवण्याचा हा प्रयत्न आहे . गेली अनेक वर्षे सतत मागण्या ,विनंती करूनही ना नगरपालिकेला जाग आली ना सरकार ला . पण आज आम्ही हे काम केले. आम्हाला एक तास प्रतिमेचे पूजन करायचे होते त्यासाठी परवानगीची गरज नव्हती . पूजन झाल्यावर आम्ही हा फोटो काढून घेतला आहे . "
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.