सातारा : भाजपचे प्रदेश कार्यकारिणी सदस्य अतुल भोसले यांची नुकतीच पंढरपूर येथील विठ्ठल रूक्‍मिणी मंदीर समितीच्या अध्यक्षपदी निवड झाली. या निवडीनंतर श्री. भोसले हे कार्यभार स्वीकारून कऱ्हाडात आल्यावर त्यांचे स्वागत करण्यासाठी भाजपच्या नगरसेवकांबरोबरच पृथ्वीराज चव्हाण यांच्या पॅनेलमधून निवडून आलेले नगरसेवक ही उपस्थित होते. अलिकडे या नगरसेवकांचे पृथ्वीराज बाबांशी फिस्कटले असल्याने ते न्यूट्रल वाटत असले तरी भाजपशी झालेली त्यांची जवळीक आगामी काळात वेगळ्या राजकरणाची नांदी येथे पहायला मिळण्याची शक्‍यता आहे.
कऱ्हाड पालिका निवडणुकीत पृथ्वीराज चव्हाण यांच्या नेतृत्वाखाली पॅनेलचे 16 नगरसेवक निवडून आले तर भारतीय जनता पक्षाचे चार नगरसेवक आणि नगराध्यक्ष थेट जनतेतून निवडूण आला. त्यामुळे सभागृहात वर्चस्व असूनही नगराध्यक्षपद भाजपकडे असल्याने या सर्वांची कोंडी होत आहे. पण ही कोंडी फोडून भाजपची ताकद वाढावी म्हणून मध्यंतरी भाजपचे प्रदेश कार्यकारिणी सदस्य अतुल भोसले यांनी एक प्रयोग करून बघितला. मुख्यमंत्र्यांच्या उपस्थितीत कऱ्हाडात पक्ष प्रवेशाचा कार्यक्रम व मेळावा घेतला. पण या मेळाव्यात महाबळेश्‍वर, खंडाळ्यासह इतर नगरसेवक व पदाधिकाऱ्यांनी प्रवेश केला. मुळात कऱ्हाडातील पृथ्वीराज चव्हाण गटातील नगरसेवक प्रवेश करतील या अंदाजाने हा कार्यक्रम घेतला होता. पण एक दोघांनी भाजप प्रवेशास नकार दिल्याने हा प्रयोग फिस्कटला.
पृथ्वीराज चव्हाण यांच्या नेतृत्वाखालील पॅनेलमधून निवडून आले असलेतरी त्यांचे बाबांशी फिस्कटलेले आहे. त्यामुळे हे नगरसेवक न्युट्रल राहण्याचा प्रयत्न करत असले तरी ते भाजपच्या संपर्कात आहेत. हा संपर्क प्रवेशात रूपांतरीत होऊ शकलेला नाही. मागील काही दिवसांपूर्वी माजी मुख्यमंत्री पृथ्वीराज चव्हाण यांच्या आईवडीलांच्या स्मृतिदिनाचा कार्यक्रम होता. या कार्यक्रमालाही त्यांच्याच गटाचे नगरसेवक उपस्थित नव्हते. पण मुख्यमंत्र्यांनी अतुल भोसलेंना ताकद देण्यासाठी त्यांची पंढरपूर येथील विठ्ठल रूक्‍मिणी मंदीर समितीच्या अध्यक्षपदावर नियुक्ती केली. या निवडीनंतर अतुल भोसले आपल्या पदाचा कार्यभार स्वीकारून पंढरपूरहून कराडात आले. त्यावेळी त्यांच्या स्वागतासाठी भाजपच्या नगरसेवक व नगराध्यक्षांसह पृथ्वीराज बाबांच्या गटाचे नगरसेवकही उपस्थित होते. एका बाबाच्या स्वागतासाठी दुसऱ्या बाबांचे नगरसेवक गेल्याने कऱ्हाडात चर्चेचा विषय झाला. पण बाबांचे नगरसेवक न्यूट्रल राहण्याच्या नावाखाली भाजपशी सलगी साधून असल्याने आगामी काळात वेगळ्या राजकारणाची नांदी पहायला मिळण्याची शक्‍यता आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.