भवानीनगर : येथील छत्रपती सहकारी साखर कारखान्याचे अध्यक्ष प्रदीप निंबाळकर यांनी आज दुपारी स्वतःवर गोळी झाडून आत्महत्या केली. त्यांच्या कुटुंबियांनी ते पिस्तूल साफ करत असताना चुकून गोळी उडाल्याचा दावा केला आहे. पोलिस हा दावा तपासून घेत आहेत.
राज्यातील साखर कारखानादीर अग्रेसर समजल्या जाणाऱ्या छत्रपती साखर कारखान्याच्या अध्यक्षपदी प्रदीप निंबाळकर यांची ३१ आॅक्टोबर रोजीच बिनविरोध निवड झाली होती. त्यांच्या निवडीनंतर जेसीबीने गुलाल उधळून आंनदोत्सव साजरा करण्यात आला होता. परंतु, निवडीनंतर पाचच दिवसांत त्यांनी केलेल्या आत्महत्येमुळे कारखान्याच्या कार्यक्षेत्रासह इंदापूर व बारामतीकरांना मोठा धक्का बसला आहे.
छत्रपती कारखान्यात गेल्या काही दिवसांपासून कंत्राटी कामगारांचा संप सुरू होता. या कामगारांशी बैठक घेऊ निंबाळकर यांना हा संप आजच मिटविला. परंतु, कामगारांना बोनस देण्याच्या मुद्‌द्‌यावर काही संचालकांचे कार्यकारी संचालकांशी मतभेद झाले होते. त्यामुळे निंबाळकर तणावात होते.
कारखान्यापासून त्यांचे घर दोन किलोमीटर अंतरावर आहे. ते दुपारी अडीचच्या सुमारास सुमारास स्वतःच्या घरात वरच्या मजल्यावर होते. इतर कुटुंबीय खालच्या मजल्यावर होते. त्यांच्याकडे स्वतःचे पिस्तूल होते. या पिस्तूलातून त्यांनी स्वतःच्या छातीत गोळी झाडली. गोळी झाडल्याचा आवाज ऐकून कुटुंबीय वर पळाले. तेव्हा निंबाळकर रक्ताच्या थारोळ्यात होते. त्यांना तातडीने बारामती येथील रुग्णालयात उपचारासाठी नेण्यात आले. उपचारादरम्यान त्यांचा मृत्यू झाला. त्यांच्या मागे पत्नी, वडील, एक मुलगा, एक मुलगी व एक भाऊ असा परिवार आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.