नाशिक - महाराष्ट्राचे चेरापुंजी, धरणांचा जिल्हा अन् अगदी मुंबईची तहान भागवणारे नाशिक अशा विविध बिरुदावलींनी गोंजारल्या जाणा-या नाशिक जिल्ह्यातील सहा प्रमुख धरणांनी तळ गाठला आहे. जिल्ह्यातील धरणांत 29 टक्के साठा शिल्लक आहे. त्यामुळे आगामी काळात कालव्यांतून पाणी सोडतांना संघर्षाची चिन्हे आहेत.
जिल्ह्यातील चोवीस मोठ्या प्रकल्पांपैकी गौतमी गोवरी, वाघाड, केळझर, पुणेगाव, नागासाक्या, माणिकपुंज ही सात धरणे अन् नांदूरमधमेश्वर प्रकल्पांनी तळ गाठला आहे. जिल्ह्यातींल धरणांची साठवण क्षमता 65,814 दशलक्ष घनफूट असून त्यात सध्या 19,202 दशलक्ष घनफूट असा 29 टक्के साठा आहे. जिल्ह्यात गोदावरी, गिरणा आणि पालखेड हे पाटबंधारे समुह असून यामध्ये अनुक्रमे 42, 21 आणि 68 टक्के साठा आहे.
गेल्या महिन्यात 23 मार्चला 36 टक्के साठा होता. मात्र बाष्पीभवन, सिंचनाची मागणी यामुळे सध्या 29 टक्के साठा आहे. त्यामुळे पिण्याच्या पाण्याचे नियोजन करतांना आरक्षण असलेल्या गावे, पाणीपुरवठा योजनांसाठी 31 जुलै अखेर तीन महिन्यांचे नियोजन करण्यावर पाटबंधारे व जिल्हा प्रशासनाचा भर आहे. त्यादृष्टीने सध्या प्रशासन काळजी घेत आहे.
धरणांची वाटचाल तळ गाठण्याकडे सुरु असल्याने कालव्यांना पिण्याचे पाणी सोडतांना परिसरातून अनधिकृत उपसा होऊ नये यासाठी विशेष खबरदारी घ्यावी लागत आहे. पालखेड धरणातून पाणी सोडतांना पिंपळगाव बसवंत परिसरातील शंभर डोंगळे त्यासाठी पोलिस बंदोबस्तात काढण्यात आले. त्यावरुन राजकारण सुरु झाले असून स्थानिक आमदार अनिल कदम यांनी आंदोलनाचा इशारा दिला आहे. त्यामुळे प्रशासन पाण्याबाबत आत्तापासूनच सावध झाले आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.