`राष्ट्रवादी'चे नेते संदीप बाजोरीया यांच्या घरावर छापे 

यवतमाळ/नागपूर : राष्ट्रवादी कॉंग्रेसचे नेते व माजी आमदार संदीप बाजोरीया 25 लाख रुपयांसह विमानतळावर आढळल्याने त्यांच्यामागे चौकशीचा ससेमिरा लागला आहे. 

प्राप्तीकर विभागाने यवतमाळ येथील बाजोरीया यांच्या घरी व कार्यालयावर छापे मारून चौकशी केली. 

विदर्भात माजी आमदार संदीप बाजोरीया ही राष्ट्रवादी कॉंग्रेसमधील बडी असामी मानली जाते. गोसेखुर्दसह इतर सिंचन प्रकल्पातील कथित गैरव्यवहाराची चौकशी करणाऱ्या `एसीबी'च्या आरोपींमध्ये बाजोरीया यांचीही फर्म आहे. संदीप बाजोरीया सुद्धा यात एक आरोपी आहेत. 

संदीप बाजोरीया 25 लाख रुपये घेऊन नागपूरहून मुंबईला गेले. बाजोरीया यांच्या बॅगमध्ये 25 लाख रुपयांची रोकड असल्याचे विमानतळांवर असलेल्या एक्‍सरे मशीनमध्ये निदर्शनास आले. 

विमानतळाची सुरक्षा करणाऱ्या `सीआयएसएफ'च्या जवानांनी ही बाब मुंबईतील `सीआयएसएफ'ला दिली. 

संदीप बाजोरीया मुंबईच्या विमानतळावर उतरल्यानंतर `सीआयएसएफ'ने बाजोरीया यांची चौकशी केली. यावेळी त्यांच्या बॅगमध्ये 25 लाख रुपयांचे रोख रक्कम आढळून आली.

मुंबईत एक फ्लॅट खरेदी करण्यासाठी ही रक्कम नेत असल्याचा दावा बाजोरीया यांनी केला. एवढी मोठी रक्कम रोकड मिळाल्याने `सीआयएसफ'ने इन्कम टॅक्‍स विभागाला कळविले. इन्कम टॅक्‍स विभागाने तात्काळ यवतमाळ येथील बाजोरीया यांच्या घरी व कार्यालयावर छापे मारले. या छाप्यातून नेमकी कोणती माहिती मिळाली, हे अद्याप कळले नाही.

राजकारणाच्या बित्तंबातम्यांसाठी डाऊनलोड करा sarkarnama अॅप