नाशिक : चांदवडला यंदा भीषण दुष्काळ आहे. पिण्याच्या पाण्याचीही प्रतिक्षा करावी लागते. त्यांच्या या दुःखाने जणु डोळ्यातले अश्रुही आटलेत. मात्र, तालुक्‍यातील रोईंगपटु दत्तू भोकनळला ऑलिंपिक स्पर्धेत सुवर्ण पदक मिळावे यासाठी आमदार डॉ. राहूल आहेर यांनी आवाहन केले अन्‌ होळखरांच्या किल्ल्याच्या पहाडाच्या कातळालाही पाझर फुटावा तसा मदतीचा ओघ सुरु झाला. तासाभरातच आॅलिंपिकच्या 'सोन्या'साठी येथे दिवाळीच्या पुर्वसंध्येला मदतीच्या पैशाचा पाऊस पडला.
दीपावलीच्या निमित्ताने आमदार डॉ. राहुल आहेर यांचा तालुक्‍यातील सर्वपक्षीय नेते, कार्यकर्ते, नागरिकांना एकत्र करुन शुभेच्छांचा कार्यक्रम आज सकाळी शासकीय विश्‍मागृहावर झाला. तालुक्‍याचा सुपुत्र दत्तू भोकनळ याने आशियाई स्पर्धेत रोईंग मध्ये सुवर्ण पदक मिळविले आहे. सध्या तो 2020 च्या ऑलिंपिक स्पर्धेची तयारी करीत आहे. त्याला आर्थिक मदत करणे हा दीपावली बैठकीचा मुळ हेतू होता. यंदा या तालुक्‍यात प्रचंड दुष्काळ आहे. शेतकरी ऐन पावसाळ्यातच अक्षरशः आकाशाकडे डोळे लावुन बसलाय.
मात्र दत्तू भोकनळच्या मदतीचा विषय निघाल्यावर दुष्काळाने आटलेल्या कातळालाही पाझर फुटला. डॉ. आहेर यांनी स्वतःचे एक लाखांची मदत जाहिर केली. त्यांच्या आवाहनानंतर माजी आमदार शिरीष कोतवाल, नगराध्यक्ष भुषण कासलीवाल, अशोक व्यवहारे, डॉ. आत्माराम कुंभार्डे, रावसाहेब भालेराव, डॉ. नितीन गांगुर्डे या सर्वपक्षीय नेत्यांसह पोलिस निरिक्षक संजय पाटील, विभागीय अधिकारी महेशपाटील, कृषी अधिकारी साळुंखे यांसह सर्व शासकीय संस्थांचे कर्मचारी, ग्रामपंचायत, पतसंस्था, बॅंकांच्या पदाधिकारी मदतीला तयार झाले. अनेकांनी एक दिवसाचे वेतन जाहीर केले. यामध्ये पाहता पाहता सहा लाखांचा निधी जमा झाला. येत्या दोन तीन दिवसांत अन्य संस्था आपला निधी देतील. हा सर्व निधी तहसीलदारांकडे जमा केला जाईल. ते हा निधी भोकनळच्या बॅंक खात्यात जमा करतील.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.